ՀՀԿ-ն իր որոշումը կհրապարակի այսօր. «Հրապարակ»

«Հրապարակ»-ը գրում է. «Այսօր տեղի կունենա Ընտրա­կան օրենսգրքի բարեփո­խումների հանձնաժողովի հերթական նիստը՝ խորհրդարա­նական ձևաչափով: Հիշեցնենք, որ խորհրդարանական չորս ուժերից բաղկացած աշխատանքային խումբ է ձևավորվել, որը կառավարական հանձնաժողովին զուգընթաց նիստեր է անում, քննարկումներ անցկաց­նում, որի ընթացքում ամեն ուժ իր առաջարկներն ու պատկերացում­ներն է ներկայացնում Ընտրական օրենսգրքի փոփոխությունների վերաբերյալ:

Բայց կառավարությունը կարծես որոշել է հաշվի չնստել ԱԺ աշխատանքային խմբի հետ և իր սեփական նախագիծը բերել ԱԺ՝ ներ­կայացնելու այդ նույն ուժերի դատին:

Նախորդ նիստերից մեկում կառավա­րության հանձնաժողովի քարտուղար Դանիել Իոաննիսյանի քամահրական պահվածքից հետո խորհրդարանա­կանները քիչ էր մնում դադարեցնեին հետագա քննարկումները, ուստի ԱԺ եկավ կառավարական հանձնաժողո­վի նախագահ Արարատ Միրզոյանն ու փորձեց Դանիելի թույլ տված կիքսերն ուղղել:

Ի դեպ, Դանիել Իոաննիսյանի՝ նախորդ նիստի ժամանակ ինքնավս­տահ և վերամբարձ կեցվածքը, երբ պատգամավորներին խորհուրդ էր տվել իրենց հետ «բազարի» մեջ չմտնել, իրականում իր պատճառ­ներն ունի: Մենք տեղեկացանք, որ նիստից առաջ Դանիելը հանդիպել է վարչապետ Նիկոլ Փաշինյանին, որն էլ վստահեցրել է, որ ինչ նախագիծ էլ լինի, ԱԺ-ն կընդունի, և ՀՀԿ-ն ցա­նկացած դեպքում կողմ կքվեարկի: Սա «դուխավորել» է Դանիելին ու առիթ տվել նման ելույթի՝ վրդովեց­նելով պատգամավորներին:

Այսօրվա նիստի օրակարգա­յին հիմնական հարցը լինելու է ընտրական համակարգի մոդելի քն­նարկումը: Նոր իշխանությունները որոշել են իսպառ հրաժարվել ՀՀԿ-ի «մոգոնած» խիստ վտանգավոր ու մերժելի ռեյտինգային համակար­գից՝ նախընտրելով փակ ցուցակնե­րով համամասնական տարբերակը, երբ ընտրողը միայն քաղաքական ուժին է ձայն տալու: Ռեյտինգայինը, հիշեցնենք, ՀՀԿ-ի վերջին մանիպուլյացիոն «սխրանքն» էր՝ հանուն վերարտադրության, որից դժգոհ էին նաև ՀՀԿ-ի ներսում, հիմնակա­նում «գլադիատորների» վերածված ռեյտինգային թեկնածուները, որոնց Սերժ Սարգսյանն ու ՀՀԿ-ի «ուղեղ­ներն» ուղղակի քաշեցին: Նրանք մինչև հիմա հոգու խորքում, երբեմն էլ՝ բացահայտ, հայհոյում են գործող Ընտրական օրենսգիրքն ու ռեյտինգային համակարգը հորինողներին: Համակարգ, որի արդյունքում մեծ փողեր ծախսեցին, բայց շատերը չանցած խորհրդարան՝ միայն ՀՀԿ-ն շահեց դրանից»:

Մանրամասն՝ թերթի այսօրվա համարում: