Առանց իրազեկելու` առգրավել են «Եվրոպա» հյուրանոցի գույքը. ի՞նչ է պարզաբանում ոստիկանությունը. լուսանկարներ

Քիչ առաջ Yerkir.am-ը ահազանգ ստացավ, որ ՀՀ ճանապարհային ոստիկանության պարեկապահակային ծառայության աշխատակիցներն առգրավել են Երևանի Հանրապետության փողոցի երկու կողմում շարված` տարբեր հիմնարկ-հաստատությունների պատկանող` կայանատեղին ցուցանող առարկաները:

Yerkir.am-ի  հետ զրույցում Հանրապետության փողոցում գտնվող «Եվրոպա» հյուրանոցի հիմնադիր, ֆրանսահայ Վարուժան Սարգսյանը նշեց, որ տվյալ նշաններն առգրավելիս իրենց չեն իրազեկել: «Դա հյուրանոցին պատկանող գույք է, և եթե չի թույլատրվում այն տեղադրել հյուրանոցի բակում, թող իրազեկեին, մենք էլ կհեռացնեինք»,- ասաց նա:

«Եվրոպա» հյուրանոցի կառավարիչ Կարինե Խաչատրյանն էլ նշեց, որ եթե ինքը չտեսներ, որ ՃՈ աշխատակիցներն են տարել, կմտածեին, թե իրենց գույքը գողացել են: «Երբ փորձեցի ՃՈ աշխատակիցներից պարզաբանում ստանալ, թե ինչո՞ւ են իրենց գույքը տանում, նրանք  չարձագանքեցին և մեքենայով շտապ հեռացան»,- ասաց նա:

Yerkir.am-ի հետ զրույցում ՀՀ ՃՈ պետի տեղակալ Արմեն Խաչատրյանը հայտնեց, որ տարբեր առարկաներով ճանապարհի երթևեկելի մասը փակելն արգելված արարք է` օրենքի խախտում:

Մեզ հետ զրույցում ոստիկանության ԶԼՄ-ների հետ կապի, վերլուծության և լրատվության բաժնի պետ Էդգար Ջանոյանը նշեց, որ նման միջոցառումները պարբերական բնույթ են կրում, և որ տվյալ առարկաներն առգրավվել են ՃՈ հերթական ստուգայցի ժամանակ: Նա հայտնեց, որ ճանապարհային ոստիկանությունը բազմաթիվ դիմում-բողոքներ է ստացել քաղաքացիներից, որ կայանատեղիի նշանները սահմանափակում են երթևեկությունը: