Եթե` ստուգումներ, առաջինը՝ ինձանից. Գագիկ Ծառուկյանը հանձնարարական է տվել նախարարին

Վարչապետի հանձնարարական է եղել, որ լայնածավալ ստուգումներ սկսվեն հանքարդյունահանման ոլորտում, վեր հանվենբոլոր թերություններն ու բացթողումները, որոնք տեղի են ունեցել. խորհրդարանում լրագրողների հետ զրույցում ասաց Էներգետիկ ենթակառուցվածքների և բնական պաշարների նախարար Արթուր Գրիգորյանը:

«Ուսումնասիրություններն ու ստուգումները կսկսվեն մոտակա ժամանակներում: Եթե ունենանք որոշակի տեղեկատվություն այդ դաշտում, որոշում կկայացնենք»,- ասաց նա:

Հարցին՝ նրան չի՞ կաշկանդելու կուսակցական լինելը` ոլորտում կարգուկանոն հաստատելու համար՝ հաշվի առնելով, որ Գագիկ Ծառուկյանը ևս հանք ունի, Գրիգորյանն արձագանքեց. «Միանշանակ` ոչ: Ինչ վերաբերում է Գագիկ Ծառուկյանին, ով ունի ընդերքօգտագործման թույլտվություն, մենք միասին զրուցել ենք, նա տվել է հետևյալ հանձնարարականը՝ եթե` ստուգումներ, ապա առաջինը` ինձանից»:

Նա հստակեցրեց, որ Ծառուկյանը հանձնարարական է տվել որպես կուսակցության ղեկավար: Ըստ Գրիգորյանի` Ծառուկյանը թաքցնելու բան չունի, իսկ նախարարությունը կաշխատի հրապարակային, ամեն ինչ թափանցիկ կլինի: