Հանձնարարական էի տվել, առ այսօր ոչ մի ինֆորմացիա չեք տվել. վարչապետը` սպորտի նախարարին

Այսօր կառավարության նիստում վարչապետ Կարեն Կարապետյանը հանձնարարական տվեց ՀՀ սպորտի և երիտասարդության հարցերի նախարարությանը` սպորտի մասսայականացման վերաբերյալ:

«Հաշվետվությունների ժամանակ որոշակի բաներ են պարզվել, որ այս ոլորտում քաղաքականություն իրականացնելիս կան համակարգային խնդիրներ: Այդ պատճառով հանձնարարում եմ ՀՀ ԿԳ և սպորտի ու երիտասարդության նախարարներին` վերանայել կրթական բոլոր մակարդակներում ֆիզիկական կուլտուրային վերաբերող կրթական ծրագրերը և ներկայացնել առաջարկություն այսուհետ դրանք համատեղ հաստատելու վերաբերյալ: Գույքագրել հանրակրթական, միջին և մասնագիտական հաստատություններում սպորտային դահլիճները, մարզային գույքը, ներկայացնել առկա խնդիրները և դրանց հնարավոր լուծման տարբերակները»,- ասաց վարչապետը:

Հանձնարարվեց նաև ՀՀ ՏԿԶ նախարարին` մեկամսյա ժամկետում ուսումնասիրել մարզպետարանների ենթակայությամբ գործող մանկապատանեկան մարզադպրոցների գործունեության արդյունավետությունը, սպորտի և երիտասարդության նախարարության հետ համատեղ մշակել հստակ չափորոշիչներ այդ հաստատությունների կառավարման և գործունեության կազմակերպման համար:

«Խնդիրը ո՞րն է, կրթական ծրագրերը ունիֆիկացված չեն, տարբեր տեղերում տարբեր կրթական ծրագրեր կան, ստանդարտներ գոյություն չունեն: Պարո'ն Ռոստոմյան, մասսայական սպորտի վերաբերյալ հանձնարարում եմ գույքագրել ակտիվները, թեև այս հանձնարարականը տրվել էր ավելի շուտ: Առ այսօր մենք ձեզանից որևէ ինֆորմացիա չենք ստացել, թե ոնց ենք անում, որ գյուղական համայնքներում ակտիվանա սպորտը: Ուշադիր եղեք»,- ասաց վարչապետը: