«Շիրակ»-ը կզրկվի չեմպիոնությունից. ՈՒԵՖԱ-ն վարույթ կսկսի այս գործով

Այսօր՝ մայիսի 18-ին,  Ֆուտբոլի ակադեմիայում ՀՖՖ նախագահ Ռուբեն Հայրապետյանը հանդիպեց  լրագրողների հետ: 

Հանդիպման ընթացքում հայտարարվեց, որ պայմանավորված խաղ անցկացնելու փորձի մեջ մեղադրվող «Շիրակ» ակումբի նկատմամբ ՀՖՖ Կարգապահական կոմիտեի կայացրած որոշումը չի փոխվի, եւ ՈՒԵՖԱ-ն վարույթ կսկսի այս գործով:

Լրագրողներին ներկայացվեցին գործով փաստերը, թիմի մարզիչ Արարատ Հարությունյանի ու «Բանանց»-ի ֆուտբոլիստի խոսակցության ձայնագրությունները:

Բարձրագույն խմբի առաջնության ավարտից 1 տուր առաջ  մրցաշարային աղյուսակը գլխավորող «Շիրակ»-ը նահանջեց  4-րդ հորիզոնական:

Հիշեցնենք, որ ՀՖՖ կարգապահական կոմիտեն որոշում էր կայացել «Շիրակ»-ին տուգանել նվազագույն աշխատավարձի 7- հազարապատիկի չափով, ինչպես նաեւ Բարձրագույն խմբի ընթացիկ առաջնությունում թիմի միավորները նվազեցնել 12-ով:

«Շիրակ»-ն իրավունք ունի 21-օրյա ժամկետում բողոքարկում ներկայացնելու ՈՒԵՖԱ, ապա նաև Լոզանի արբիտրաժային դատարան: