Կարմրուկով հիվանդացության ցուցանիշները մխիթարիչ չեն. օրգանիզմը կորցնում է իմունային հիշողությունը

Կարմրուկով հիվանդացության այս տարվա ցուցանիշները մխիթարիչ չեն՝ արդեն իսկ 14 դեպք է գրանցվել: Այս մասին լրագրողների հետ զրույցում ասաց ԱՆ իմունականխարգելման ազգային ծրագրի ղեկավար Գայանե Սահակյանը:

Նրա խոսքով` 14 հիվանդացածներից 12-ը պատվաստված չեն եղել: «Կարմրուկի տարածման համար նպաստավոր պայմաններ են այժմ ստեղծվել, քանի որ չպատվաստված երեխաների, անձանց կուտակումներ կան: Տեսեք` եթե տարիներ առաջ թիրախային խմբից ընդամենը 10 մարդ էր հրաժարվում պատվաստվել, այսօր, օրինակ, նրանց թիվը 100-ի է հասել: Սա նշանակում է, որ վարակն ավելի հեշտ կտարածվի, այսինքն՝ վիրուսին հանդիպելու հավանականությունն ավելացել է»,- ասաց Սահակյանը:

Նա նշեց նաև, որ չպատվաստված երեխաները, վարակը տարածելով, վնասում են նաև այն երեխաներին, որոնց հակացուցված է պատվաստվելը: Կարմրուկի ցանը, մասնագետի խոսքով, սկսվում է  դեմքից, հիվանդության ախտանշաններն են գրիպանման երևույթները և աչքերի բորբոքումը: «Եթե մարդը պատվաստված չէ և կարմրուկով հիվանդանում է, հիմնականում նաև թոքաբորբ է տանում, ինչպես նաև կորցնում է իմունային հիշողությունը: Առնվազն 3 տարի է պահանջվում, որպեսզի իմունային հիշողությունը վերականգնվի, սակայն կարմրուկի վիրուսը երբեք օրգանիզմից դուրս չի գալիս, և 7 տարվա մեջ այն կարող է կրկին ակտիվանալ: Եթե ակտիվանում է, այս դեպքում արդեն իսկ բուժում չկա, և ելքը մահն է լինում»,- ասաց Սահակյանը:

Ինչ վերաբերում է պատվաստումից հետո օրգանիզմի ռեակցիային, ապա, մասնագետի հավաստմամբ, պատվաստումից հետո կարող է առաջանալ միայն ջերմություն: Նրա խոսքով՝ պատվաստումից հետո ջերմելը նորմալ է համարվում, քանի որ օրգանիզմն այդ կերպ փորձում է պատասխան ռեակցիա տալ օտար մարմնին: Ի դեպ, ջերմությունն անցնում է 1-2 օրվա ընթացքում:

Հիշեցնենք, որ Սահակյանը նշել էր նաև, որ Հայաստանում թիրախային խմբերին պատվաստելու` 2 տոկոսով անկում է նկատվել: