Թատրոնի շենքի կողքով անցնելիս մտածում են՝ էս ինչ լավ օբյեկտ կլիներ. Լևոն Հարությունյան

Այսօր Թատրոնի միջազգային օրն է: Դերասան Լևոն Հարությունյանի խոսքով՝ իրականում պետք է ստեղծվի մթնոլորտ, որ տոնը տոն լինի:

Ըստ նրա՝ այդպես էլ չկարողացան երեկվանը տեղավորել այսօրվա մեջ, քանի որ չգնահատվեց ունեցածը. եթե տարիներ առաջ ընդունում էին թատրոնի դերը, հիմա ամեն քայլափոխի ստորացնում են:

«Շատ ծիծաղելի է այն, որ թատրոնի վրա պլան են դրել: Թատրոնի շենքի կողքով անցնելիս հիմա մտածում են՝ էս ինչ լավ օբյեկտ կլիներ: Ազգային ծրագիր չունենք, մշակութային ծրագիր չունենք, գաղափաներ չունենք, փող չկա… Մեր երկրում վերջին շրջանում խոսելն էլ բան չի փոխում, այստեղ ուզում ես անընդհատ լռել»,- ասաց Հարությունյանը:

Նրա կարծիքով՝ պետք է հայտնվի լիդեր, ով, ոլորտները հերթով փոխելով, առաջ կգնա: Հակառակ դեպքում, ըստ դերասանի, հիմա, երբ հաջողված ներկայացում են ունենում, մարդիկ են հայտնվում ու «փայ» ուզում: «Թատրոնում ամեն ինչ թանկացրել են՝ վարձակալությունը, դեկորները, բայց այս մասնագիտությունը մատուցողներին ստորացնում են: Պետք է սկսենք երկիր սարքել, իսկ սա միայնակ անել չի լինի, պետք է միասին լինենք, միասին հասնենք փոփոխության»,- ասաց Հարությունյանը: