Առևանգված աղջկա հետևից գնալիս վթարի են ենթարկվել. 2 մարդ է զոհվել

Փետրվարի 27-ին` ժամը 04:17-ին, ահազանգ է ստացվել, որ Ագարակ-Ոսկեվազ ավտոճանապարհին «Ford» մակնիշի ավտոմեքենան դուրս է եկել ճանապարհի երթևեկելի հատվածից և շրջվել, կան տուժածներ:

Դեպքի վայր է մեկնել մեկ մարտական հաշվարկ:

Պարզվել է, որ Աշտարակ-Ագարակ ավտոճանապարհի 5-րդ կմ-ին «Ford» մակնիշի 55 AM 755 պետհամարանիշով ավտոմեքենան (վարորդ՝ Ա. Գ.) դուրս է եկել ճանապարհի երթևեկելի հատվածից (մոտ 15 մ) և շրջվել՝ հայտնվելով դաշտամիջյան հատվածում. ուղևոր՝ 1949 թ. ծնված Ջ. Գ.-ը տեղում մահացել է:

1975 թ. ծնված Ա. Գ.-ը, ուղևորներ՝ 1981 թ. ծնված Լ. Կ.-ը, 1976 թ. ծնված Ս. Ֆ.-ը և 1970 թ. ծնված Գ. Գ.-ը տեղափոխվել են Աշտարակի բժշկական կենտրոն, որտեղ բժիշկները տուժածների առողջական վիճակը գնահատել են միջին ծանրության: Աշտարակի ԲԿ-ից «Արմենիա» ՀԲԿ տեղափոխված «Ford» մակնիշի ավտոմեքենայի ուղևոր Ս. Ֆ.-ը ժամը 08:00-ի սահմաններում հիվանդանոցում մահացել է:

Փրկարարները հոսանքազրկել են ավտոմեքենան, փակել գազի բալոնի փականը, տուժածներին և քաղաքացու դին մոտեցրել շտապօգնության ավտոմեքենային:

Ըստ shamshyan.com-ի՝ դեպքի վայրում հավաքվածները նշում էին, որ վարորդն ու ուղևորները մեկնում էին ինչ-որ գյուղ, որտեղ գտնվում էր նրանց ազգական աղջիկը, ում առևանգել էին: 

ՀՀ Քննչական կոմիտեն հայտնում է, որ դեպքի առթիվ հարուցվել է քրեական գործ՝ ՀՀ քրեական օրենսգրքի 242-րդ հոդվածի 3-րդ մասով:

Կատարվում է քննություն, ձեռնարկվում են անհրաժեշտ քննչական և դատավարական գործողություններ` վթարի պատճառներն ու բոլոր հանգամանքները պարզելու ուղղությամբ: