Նոյեմբերի 25-ի լույս 26-ի գիշերը 7 հազար` գազի աշխատակիցների մոտ բռնկում եղավ առ Նժդեհ. Նաիրա Զոհրաբյան

Այսօր ԱԺ արտահերթ նիստում, ուր քննարկվում էր «Կուսակցությունների մասին» օրենքում փոփոխություններ կատարելու հարցը, ելույթ ունեցավ ԱԺ ԲՀԿ խմբակցության ղեկավար Նաիրա Զոհրաբյանը, ով նշեց, թե սխալ տպավորություն կարող է ստեղծվել, թե ԲՀԿ-ն դեմ է կուսակցությունների գրանցման լիբերալացման:

«Ուզում եք` այնքան հեշտացրեք գրանցումը, որ եթե երկու հոգի վետերոկում հանդիպեն ու որոշեն կուսակցություն բացել, անգամ գրանցման պահանջ չլինի: Թող բացեն, բայց հիշեք, որ այդ մարդ-կուսակցությունները հետո պրոբլեմ են դառնում քաղաքական կյանքի համար` վագոնչիկի նման կցվելով այս կամ այն կուսակցությանը: Մեկ հոգին թող հայտարարի, որ ինքը մտքի գիգանտ է, որ ավելին արժե, քան երեսուն հազար անդամ ունեցող կուսակցությունը, թող գրանցի իր բնակարանի հասցեով, գրասենյակ էլ թող չունենա, և եկեք մեծացնենք կուսակցությունների թիվը: Կուսակցությունը կազմված կլինի անձից ու նրա կնիքից»,- հեգնեց պատգամավորը:

Նրա կարծիքով` այն կուսակցությունները, որոնք չեն մասնակցում ընտրություններին, անելիք չունեն, ուստի պետք է ֆիլտրել այդ կուսակցություններին:

Զոհրաբյանն անդրադարձավ պաշտոնեական դիրքի չարաշահմանը` հանուն կուսակցության: «Նոյեմբերի 25-ի լույս 26-ի գիշերը 7 հազար` գազի աշխատակիցների մոտ տրանսֆորմացիա տեղի ունեցավ, մարդիկ հասկացան որ պետք է դառնան ՀՀԿ-ական, Նժդեհի հետևորդներ, նրանց մոտ մեկ գիշերում բռնկում եղավ առ Նժդեհ: Միգուցե դա Կարեն Կարապետյանի նվերն էր ՀՀԿ-ական դառնալու առթիվ: Հիմա գազավիկ լինելը մոդայիկ է, համարվում են պռախոդ ունեցող էլիտա, բայց բոլորս էլ հասկանում ենք, որ սա ճանապարհ չէ»,- ասաց Նաիրա Զոհրաբյանը: