Ենթաօրենսդրական ակտերով կլինեն կարգավորումները. Լևոն Մկրտչյան

Խորհրդարանում լրագրողների հետ զրույցում ՀՀ ԿԳ նախարար Լևոն Մկրտչյանը, խոսելով ուսանողների հետ կլոր սեղան-քննարկումների մասին, նշեց, որ եթե հասարակության յուրաքանչյուր շերտ կարողանա իր խնդիրները բարձրաձայնել այն կերպ, ինչպես ուսանողները, գործադիր և օրենսդիր իշխանություններին շատ օգնած կլինի:

«Գործընթացը դրական հուն ունի: Մենք պետք է խոսենք գիտության ռեֆորմներից, որովհետև թվերը տխուր էին: Տարկետումը դառնում է մոտիվացիա գիտություն գնալու համար, այդպես չի լինում, պետք է ուրիշ մոտիվացիա տանք, խրախուսենք երիտսարդներին` գիտությամբ զբաղվելու»,- ասաց նախարարը:

Հարցին` արդյո՞ք պատճառը գիտության մեջ ցածր աշխատավարձեր չեն, որ գիտությունը չի գրավում երիտասարդներին , նախարարը պատասխանեց. «Իհարկե, շատ խնդիրներ ունենք, խնդիրները շատ հիմնարար են, բայց նաև գիտության պրոբլեմները սերտորեն առնչված են բարձրագույն կրթության հիմնախնդիրների հետ»:

Մկրտչյանը նշեց, որ ենթաօրենսդրական ակտերը կտան բոլոր խնդիրների կարգավորումները: