Պուտինի և Թրամփի համատեղ հայտարարությունը

ՌԴ նախագահ Վլադիմիր Պուտինը և ԱՄՆ նախագահ Դոնալդ Թրամփը հրապարակել են Սիրիայի վերաբերյալ համատեղ հայտարարությունը, որն ընդունվել է Վիետնամում Ասիական-խաղաղօվկիանոսյան տնտեսական համագործակցության գագաթաժողովի շրջանակում տեղի ունեցած կարճ հանդիպման արդյունքում. հայտնում է РИА Новости-ն:

Մասնավորապես` ղեկավարները հաստատել են Սիրիայում «Իսլամական պետություն» ահաբեկչական խմբավորմանը պարտության մատնելու վճռականությունը, ինչպես նաև պայմանավորվել շարունակել համատեղ ջանքերը ԻՊ-ին վերջնականապես ոչնչացնելու համար:

Պուտինը և Թրամփը նաև նշել են, որ հակամարտությունը ռազմական լուծում չունի, և հաստատել են , որ աջակցում են Սիրիայի ինքնիշխանությանը, անկախությանը և տարածքային ամբողջականությանը:

Ավելի վաղ ՌԴ նախագահի մամուլի քարտուղար Դմիտրի Պեսկովը հայտնել էր, որ նախագահները քննարկել են Սիրիայի հարցը: