Բելառուսը որս է հայտարարել օտարերկրյա զբոսաշրջիկների նկատմամբ. Լապշին

Բելառուսն աշխարհում գնալով ավելի է ասոցացվում «չարիքի առանցքի» և «Եվրոպայի վերջին բռնապետության» հետ: Այդ մասին իր բլոգում գրել է Ալեքսանդր Լապշինը:

«Լուկաշենկոն նախ Մինսկի բանտում պահում էր ինձ՝ կասպյան սուլթան Ալիևի խնդրանքով, այնուհետև` ճապոնացի արվեստագետ Դաիչի Յոշիդային, իսկ այժմ ձերբակալվեց ֆրանսիացի ճանապարհորդ Ժալյան Վիյեն»,- գրել է նա:

Ըստ Լապշինի` դժբախտ տղայի ամբողջ մեղքն այն է, որ նա Բելառուսից Ուկրաինա ուղևորվելիս ազնիվ կերպով մոտեցել է մաքսայիններին և հայտարարագրել հուշանվեր փամփուշտը, որը նրան նվիրել էին: Լապշինի խոսքով` ֆրանսիացուն ձերբակալել են և տեղափոխել Գոմելի մեկուսարան, մեղադրել զենք-զինամթերքի մաքսանենգության մեջ:  228-րդ հոդվածով` նրան սպառնում է մինչև 7 տարվա ազատազրկում:

Լապշինը պատմում է, որ Վիյեին պահում են դաժան պայմաններում, զրկում ընտանիքի հետ տեսակցության իրավունքից, երկար ժամանակ նրան թույլ չէին տալիս հանդիպել  փաստաբանի և Ֆրանսիայի հյուպատոսի հետ:

«Ուշագրավ է նաև, որ աղմուկը բարձրանալուն պես Գոմելի մաքսային ծառայությունը ոչնչացրել է նրա մաքսային հայտարարագրումը, որում  ֆրանսիացին ազնվորեն նշել էր, որ իր հետ փամփուշտ է տանում»,- գրել է բլոգերը: