Բարձրացվելու է մարզադպրոցների կառավարման և գործունեության արդյունավետությունը

Այսօր կառավարության նիստում տարածքային կառավարման և զարգացման նախարար Դավիթ Լոքյանը ներկայացրեց որոշում մարզադպրոցների կառավարման և գործունեության կազմակերպման արդյունավետության բարձրացմանն ուղղված միջոցառումների ծրագիրը հաստատելու մասին: Որոշումը նախատեսում է կանոնակարգել հանրապետության տարածքում գործող շուրջ 178 մարզադպրոցների գործունեությունը: Կատարված ուսումնասիրությունների արդյունքում ֆիքսվել է, որ չկան որոշակի կանոնակարգումներ, մարզիչ-սան հարաբերակցություն, չկան ֆինանսական հստակ մեխանիզմներ:

Ելնելով դրանից` նախարարությունը թվով 25 առաջարկություն է ներկայացրել կառավարությանը, որոնք պետք է իրականացվեն մինչև տարեվերջ, և կարգավորվելու  է հանրապետության տարածքում շուրջ 40 հազար մարզիկներին սպասարկող այդ հիմնարկների գործունեությունը:

Հաշվի առնելով ֆիզիկական կուլտուրա առարկայի դերակատարումը մատաղ սերնդի առողջության պահպանման և ամրապնդման գործում, ինչպես նաև ուսումնական հաստատություններում մարզական գույքի պահանջարկը՝ մարզական ուսումնական գործընթացն առավելագույնս արդյունավետ կազմակերպելու համար անհրաժեշտություն է առաջացել նախ մշակել միասնական ուսումնական ծրագրեր, ինչպես նաև մարզադահլիճներն ապահովել ժամանակակից մարզական գույքով:

Սպորտի հիմնախնդիրներից է 18 տարեկանից բարձր տարիքի հեռանկարային մարզիկների պարապմունքների կազմակերպումը մանկապատանեկան մարզադպրոցներում, որը կլուծվի բարձրագույն վարպետության դպրոցների ստեղծմամբ: 

Վարչապետ Կարեն Կարապետյանը հարցրեց սպորտի նախարարին, թե արդյո՞ք այդ որոշմամբ լուծվում է խնդիրը: Սպորտի նախարարը դրական պատասխան տվեց: