YouTube-ի տեսանյութերի որակը բարձրացվելու է

Google-ը գնել է իռլանդական տեսանյութերի տեխնոլոգիական ընկերությունը` Green Parrot Picture-ը, որի շնորհիվ պետք է բարձրացնի YouTube-ում տեղադրված տեսանյութերի որակը:

Green Parrot Pictures-ը կարողանում է հարթել լողացող կադրերը, որոնք տեսախցիկը շարժելու հետեւանք են, ինչպեսեւ թուլացնում է կադրի կանաչության աստիճանն ու կտրտվածությունը, ունի նաեւ այլ հնարավորություններ:

«Օրինակ` վերցնենք Լիբիայի ըմբոստության տեսանյութերը: Չնայած դրանք հուզական տեսանկյունից գրավիչ են, սակայն  կտրտված են, եւ շարժումը շատ է: Իսկ ի՞նչ կասեք, եթե մի տեխնոլոգիա լինի, որը հնարավորություն կտա բարձրացնելու տեսանյութի որակը` նվազեցնելով կադրերի թարթումը, իջեցնելով աղմուկի ձայնը: Բավական լուրջ տեսանյութ կստացվի, որն ընդամենը պարզ եղանակով տեղադրված կլինի կայքում»,- ասել է Google-ի տեսանյութերի տեխնոլոգիական գծով ղեկավար Ջերեմի Դոյգը:

Խոսքը հենց Green Parrot Pictures-ի մասին է, որը ստեղծվել է 2004 թվականին պրոֆեսոր Անիլ Կոկարամի կողմից: Նա տեսանյութերի մշակման տեխնոլոգիան ուսումնասիրել է 20 տարի, եւ նրա աշխատանքները օգտագործվել են հոլիվուդյան այնպիսի ֆիլմերի նկարահանման ժամանակ, ինչպիսիք են «Մատանիների տիրակալը», «Սարդ մարդը» եւ «Խաղատուն Ռոյալը»:

Այժմ Green Parrot Pictures-ի տեխնոլոգիան ներդրվելու է YouTube-ում եւ կիրառելի է լինելու նույնիսկ ամենավատ որակով տեսանյութերի դեպքում, որոնք նկարահանվել են բջջային հեռախոսներով:

Ընկերությունն իր պաշտոնական կայքում գրում է. «Քանի որ տեսանկարահանողները շատանում են աշխարհում եւ նրանց տեղադրած նյութերի թիվը նույնպես աճում է, ապա մեզանից պահանջվում է աշխատանքի նոր ձեւաչափ»:

Ինչպես գրում է «Թելեգրաֆը», պայմանագրի ֆինանսական պայմանները դեռեւս հայտնի չեն: