Շատ ենք տուրք տվել ռեյտինգացավին. Շարմազանով

ԱԺ արտահերթ նիստում քննարկվում է «Հեռուստատեսության և ռադիոյի ազգային հանձնաժողովի 2016 թվականի գործունեության մասին» զեկույցը:

ԱԺ փոխնախագահ Էդուարդ Շարմազանովը, հիմնական զեկուցող` ՀՌԱԿ նախագահ Գագիկ Բունիաթյանին դիմելով, ասաց, որ դրական տեղաշարժը, որ կա մեր եթերում, չի կարող չնկատել, բայց նշեց, որ հեռուստատեսության եթերը մնում է խնդրահարույց: Ըստ նրա՝ մի քիչ շատ են տուրք տվել ռեյտինգացավին: Շարմազանովն ընդգծեց, որ եթե այդ վարկանիշի հետևից գնանք, կարող է ոչ մի տեղ չհասնենք: Պատգամավորը ուշադրությունը հրավիրեց այն խնդրին, որ կան հաղորդումներ, որոնք շատ լավն են, բայց սխալ ժամերի են ցույց տալիս:

«Ես ուզում եմ, որ իմ երեխան դա տեսնի: Իմ տունը ucom կա, բայց ոչ բոլոր քաղաքացիների տունը կա, որ հետ տան, նայեն»,- ասաց նա, ապա ընդգծեց, որ այդ հաղորդումները, որոնք ունեն դաստիարակիչ նշանակություն, պետք է ցուցադրել ավելի ճիշտ ժամի:

Այնուհետև Շարմազանովն անդրադարձավ սերիալների խնդրին: «Ես սերիալներին դեմ չեմ: Ամբողջ աշխարհում կան սերիալներ: Դրանք գրող սցենարիստներին կանչեք ձեզ մոտ, քննարկեք, որ բարություն մի քիչ սերմանեն: Առանց այն էլ մեր հասարակությունը նեգատիվ շոկի մեջ է, կարելի է, չէ՞, մի քիչ լավ բաներ տալ: Մենք ինչքա՞ն կարող ենք վատը ցույց տալ: Լուսավորը ցույց տվեք: Ես չեմ ասում` ինձ ցույց տվեք, բայց մի քիչ լուսավորը պետք է ցույց տալ»,- ասաց նա և հավելեց, որ մենք սերունդ պետք է դաստիարակենք, ավելի ուշադիր պետք է լինել:

Շարմազանովը նշեց, որ հոգևոր հաղորդումներ պետք է լինեն յուրաքանչյուր հեռուստատեսության եթերում, և որ բարությունն է երկրում պակասում, դա պետք է սերմանենք:

Բունիաթյանը շնորհակալություն հայտնեց դիտարկման համար և նշեց, որ իրենց հանձնաժողովի տիրույթում չէ հեռուստածրագրերի խմբագրման առաքելությունը: «Բայց ամեն դեպքում, որպես քաղաքացի, որպես ծնող, ես էլ եմ, պարո'ն Շարմազանով, ձեզ հետ համաձայն: Հուսով եմ, որ մեր հեռուստաընկերությունների ղեկավարները մեզ լսում են»,- ասաց նա:

Բունիաթյանը նշեց, որ վարկանիշային խնդիրները չեն կարող չազդել իրենց վրա, և որ առաջին հերթին դա պետք է դիտարկել որպես բիզնես ոլորտ, ուղղակի, ըստ նրա, այդ համատեղությունը պետք է ճիշտ լինի: Նա ասաց, որ սերիալների մասով ևս համաձայն է, այդ խնդիրը կա նաև հայկական սերիալներում, իսկ հնդկական սերիալները, որոնք մեզ մոտ ցուցադրվում են, համաշխարհային տրենդ են: «Ամեն դեպքում դա էլ է քննարկվում, հուսով ենք դա կկարգավորվի, շուկան կկարգավորվի»,- ասաց Բունիաթյանը:

Շարմազանովն էլ արձագանքեց, որ կարելի է որակյալ վարկանիշային հաղորդումներ ունենալ: Նա ընդգծեց, որ վարկանիշի համար չպետք է լինեն ոչ կիրթ հաղորդումներ, կարելի է վարկանիշ ապահովել և որակյալ հաղորդում ունենալ: