ՀԱՊԿ-ը մեզ շատ բան է տվել. Շարմազանով

Այսօր ԱԺ արտահերթ նիստում քննարկվում էր ՀՕՊ համաձայնագրի վավերացման հարցը:

«Ժառանգություն» խմբակցության ղեկավար Զարուհի Փոստանջյանի ելույթին արձագանքեց ԱԺ նախագահի տեղակալ Էդուարդ Շարմազանովը:

Նշենք, որ, Զարուհի Փոստանջյանի կարծիքով, Հայաստանը աստիճանաբար վերածվում է Ռուսաստանի գուբերնիայի` չօգտագործելով իր դիվանագիտական այլընտրանքները՝ Իրանի հետ սերտ համագործակցություն հաստատելու հհնարավորությունը:

Էդուարդ Շարմազանովը նշեց, որ ՀՕՊ համաձայնագիրը վավերացնում են, ինչը բխում է Հայաստանի շահերից: Նրա համոզմամբ՝ կա բացահայտ ճշմարտություն, որ Հայաստանի նման երկրները պետք է դաշնակցեն այն երկրների հետ, որոնք տարածաշրջանում բանակ ունեն:

«Մենք պետք է դաշնակցենք Ռուսաստանի հետ, մեր միջև դաշնակցային հարաբերությունները ռազմավարական են, դաշնակցային ու երկարաժամկետ: Ռուսաստանի ու Թուրքիայի շահերն ինչքան էլ համընկնեն, երկարաժամկետ կտրվածքով նրանք հակառակորդներ են»,- ասաց Շարմազանովը:

Արձագանքելով Զարուհի Փոստանջյանի այն հայտարարությանը, թե ՀԱՊԿ-ը Հայաստանին ոչինչ չի տվել, նա ասաց. «ՀԱՊԿ-ը մեզ շատ բան է տվել, ՀԱՊԿ մտել ենք` մեր պետական շահերից ելնելով, և այս համաձայնագրով սպառազինությունը ստանում ենք` նաև ՀԱՊԿ-ից ելնելով: Որևէ պետություն, որևէ ռազմաքաղաքական բլոկ այն պայմաններով, որով տրամադրում է Ռուսաստանը սպառազինություն, Հայաստանին չի տալիս: ՀԱՊԿ-ին անդամակցումը այընտրանք չունի»: