Աշոտյանը երգ կգրի, Նիկոլ Փաշինյանն էլ կարող ա երգի. Շարմազանով

ԱԺ փոխխոսնակ Էդուարդ Շարմազանովն այսօր լրագրողների հետ զրույցում թեև ասաց, որ չի լսել պատգամավոր Նիկոլ Փաշինյանի կատարմամբ «Էրեբունի-Երևան» երգը, բայց միևնույն ժամանակ նշեց. «Շատ ուրախ եմ, որ տաղանդավոր պատգամավորներ ունենք»:

Հարցին՝ հնարավո՞ր է Տարոն Մարգարյանն էլ նմանօրինակ մի քայլ անի, ասենք՝ տեսահոլովակ նկարահանի կամ որևէ այլ երգ կատարի, մանավանդ, որ շատ երգիչներ աջակցում են նրան, Շարմազանովը պատասխանեց, որ Տարոն Մարգարյանն է օրակարգ թելադրում, այլ ոչ թե ընդօրինակում է գործընկերներին:

«Մեր` ՀՀԿ-ի քարոզչության պետ Արմեն Աշոտյանը ոչ ավանդական և շատ հետաքրքիր քարոզչական լուծումներ է տալիս: Կարծում եմ, որ որևէ մեկը Աշոտյանի պայծառ մտքի ու պայծառ ճակատի վրա չի կասկածում»,- ասաց նա:

Հարցին՝ հնարավո՞ր է Աշոտյանը երգ գրի, Տարոն Մարգարյանն էլ կատարի, Շարմազանովը պատասխանեց. «Աշոտյանը երգ կգրի, Նիկոլ Փաշինյանն էլ կարող ա երգի»: