Հունաստանի վարչապետը Տուսկին խնդրում է եվրագոտու երկրների արտահերթ վեհաժողով հրավիրել

Հունաստանի վարչապետ Ալեքսիս Ցիպրասը հայտնել է, որ դիմել է Եվրոպական խորհրդի նախագահ Դոնալդ Տուսկին՝ խնդրելով հրավիրել եվրագոտու երկրների արտահերթ վեհաժողով, եթե ապրիլի 7-ին Եվրախմբի նիստի ժամանակ չավարտվի հունական բարեփոխումների երկրորդ գնահատման գործընթացը, փոխանցում է «РИА Новости»-ն:

Երկրորդ գնահատումը հետաձգվում է արդեն չորս ամիս: Առանց դրա Հունաստանը չի կարող ստանալ պետական պարտքի սպասարկման համար վարկի հերթական տրանշը:

Նրա խոսքով՝ գնահատման ձգձգումը բերում է անորոշության և անկայունության իրավիճակի, ինչպես 2015 թվականին: Ցիպրասը հայտարարել է, որ վերջին ժամանակներս անընդհատ հայտնվում են ինչ-որ խոչընդոտներ, մինչդեռ համաձայնությունը գրեթե ձեռք է բերվել:

«Որոշ կողմեր անընդհատ առաջ են բերում պահանջներ և խոչընդոտներ են ստեղծում: Այս խաղերը հարկավոր է դադարեցնել: Առավելևս Եվրամիության համար նման դժվար ժամանակահատվածում», - ասել է վարչապետը: