Լեհաստանը կարգավարներին մեղադրել է Սմոլենսկի մերձակայքում ավիաաղետ հրահրելու համար

Լեհաստանի Գլխավոր դատախազությունը մեղադրանքներ է առաջադրել ռուսաստանցի կարգավարների, նաև  այն «երրորդ անձի» հասցեին, որը գտնվել է թռիչքների կառավարման աշտարակում, Սմոլենսկի մերձակայքում դիտավորյալ ավիաաղետ հրահրելու համար,  հայտնում է «Polska Agencja Prasowa»-ը` հղում անելով գլխավոր դատախազի տեղակալ Մարեկ Պոշչենեկին, փոխանցում է «Lenta.ru»-ն:

Նրա խոսքով՝ Վարշավան մոտ ժամանակներս կդիմի Մոսկվային՝ ռուսաստանցի ավիակարգավարների հարցաքննության համար իրավական օգնության պահանջով: Լեհաստանի ռազմաօդային ուժերի Տու-154 ինքնաթիռը Սմոլենսկի մերձակայքում ընկել է 2010 թվականի ապրիլի 10-ին: Վթարի հետևանքով զոհվել են ինքնաթիռում գտնվող բոլոր 96 ուղևորները, այդ թվում՝ նախագահ Լեխ Կաչինսկին՝ տիկնոջ հետ:

Միջպետական ավիացիոն կոմիտեն պատահարի պատճառը համարել է օդաչուների սխալը, մասնավորապես, պահեստային օդանավակայան չհեռանալու որոշումը: Լեհական կողմը կատարել է սեփական հետաքննություն և մեղքի մի մասը բարդել ռուսաստանցի կարգավարների վրա: