Իրանն է պատասխանատու տարածաշրջանում անկայունության համար. Թուրքիայի ԱԳՆ

Թուրքիայի ԱԳՆ ներկայացուցիչ Հուսեյն Մուֆթօղլուն քննադատել է Իրանին թուրքական ղեկավարության հասցեին մեղադրանքներ հնչեցնելու համար` տարածաշրջանային անկայունության պատասխանատվությունը դնելով Իրանի վրա. հայտնում է РИА Новости-ն:

Երեկ Թեհրանում Թուրքիայի դեսպանին կանչել են Իրանի ԱԳՆ` բացատրություն պահանջելու Թուրքիայի ղեկավարության` տարածաշրջանում Իրանի քաղաքականության մասին հայտարարությունների վերաբերյալ. Բահրեյն կատարած այցի ժամանակ Թուրքիայի նախագահ Էրդողանը Իրանին մեղադրել էր Սիրիայում և Իրաքում քայքայիչ գործողություններ իրականացնելու և տարածաշրջանի երկրներում իր ազդեցությունը մեծացնելու մեջ, իսկ Մյունխենի անվտանգության համաժողովում Թուրքիայի վարչապետ Յըլդըրըմը հայտարարել էր, թե Իրանը գործում է Բահրեյնի և Սաուդյան Արաբիայի դեմ: Ի պատասխան, Իրանի ԱԳՆ ներկայացուցիչ Բեհրամ Քասիմին  հայտարարել էր, որ Թուրքիան չպիտի չարաշահի Իրանի համբերությունը` միաժամանակ մեղադրելով Անկարային կայսրությունը վերականգնելու երազանքների և ահաբեկիչներին աջակցելու մեջ:

«Անհնար է հասկանալ ու մեղադրանքներ ընդունել նրանցից, ովքեր պատասխանատու են տարածաշրջանում լարվածության և անկայունության համար: Իրանի ԱԳՆ ներկայացուցիչ Բեհրամ Քասիմիի հայտարարությունն անարդարացի է: Իրանին քննադատողներին ուղղված մեղադրանքների փոխարեն, Իրանից սպասում ենք իր տարածաշրջանային քաղաքականության վերանայում և կառուցողական քայլեր»,- ասվում է Մուֆթօղլուի հայտարարությունում: