«Հպարտանալու առիթ է մեր հայրենիքի համար». Ասադը հանդիպել է արդյունաբերողների հետ

Սիրիայի նախագահ Բաշար ալ Ասադը հանդիպել է Դամասկոսի արդյունաբերողների հետ, որոնք Սիրիայի ճգնաժամի ընթացքում վնասներ կրեցին՝ կորցնելով իրենց հաստատությունները, սակայն շարունակեցին իրենց աշխատանքը փոքր արտադրամասերում:

Ըստ «Գանձասար»-ի՝ հանդիպման ընթացքում կողմերը զրուցել են Սիրիայի արդյունաբերողների դիմագրաված դժվարությունների և դրանց հաղթահարման հնարավոր միջոցների մասին՝ արդյունաբերական գործընթացը վերականգնելու և տնտեսությանը խթանելու համար:

Նախագահը հաստատել է, որ սիրիացիների՝ ապրելու հզոր կամքը Սիրիայի դիմադրողականության գլխավոր գործոնն է: «Սիրիացի արդյունաբերողները շարունակել են գործել՝ հակառակ իրենց կրած մեծ վնասներին, ինչը հպարտանալու առիթ է մեր հայրենիքի համար»,- ասել է Ասադը:

Նրա խոսքով՝ Սիրիայի պատերազմը չի սահմանափակվել ռազմական գործողություններով, այլ իր ավերիչ դերն է ունեցել երկրի հիմնական ոլորտների վրա, այդ թվում՝ տնտեսության: