Խորվաթիայում հրեաները հայտնել են Հոլոքոստի զոհերի հիշատակին նվիրված միջոցառումները բոյկոտելու մտադրության մասին

Խորվաթիայում բնակվող հրեաները հայտնել են Հոլոքոստի զոհերի հիշատակին նվիրված միջոցառումները բոյկոտելու մտադրության մասին, հաղորդում է Reuters-ը:

«Մենք այս որոշումը կայացրել ենք տեսնելով, թե ինչպես է կառավարությունը, խորհրդարանն ու նախագահը արձագանքում ուստաշների (հորվաթական ֆաշիստների ազգայնական-անջատական կազմակերպություն) փառաբանությանը: Խնդիրը ոչ միայն ուստաշների ողջույնով հուշատախտակն է, որը տեղադրվել է Յասենովաց քաղաքում, այլև Հոլոքոստի հետ կապված ամեն ինչը վերանայելու փորձերը», - ասել է հրեական համայնքի առաջնորդ Օգնեն Կրաուսը:

Աղբյուրի հաղորդմամբ` հրեական համայնքի զայրույթն առաջացրել է պատերազմի վետերանների միության ակցիան Խորվաթիայի անկախության համար: 2016 թվականի հոկտեմբերին նրանք հուշատախտակ են տեղադրել Յասենովաց քաղաքում` 1991-1995 թվականին Յուգոսլավիայի ազգային բանակի և սերբական ինքնապաշտպանական ուժերի հետ զոհված իրենց ընկերների հիշատակին:

Նշվում է, որ զոհվածների ազգանուններից բացի հուշատախտակի վրա փորագրված են ողջույնի խոսքեր, որոնք գործածել են խորվաթ աջ ծայրահեղական գրոհային-ուստաշները: Երկրորդ համաշխարհային պատերազմի տարիներին վերջիններս մի քանի տասնյակ հազարավոր հրեաներ, սերբեր, գնչուներ և հակաազգայնական խորվաթներ են ոչնչացրել Յասենովաց համակենտրոնացման ճամբարում: