Հոլոքոստի զոհերի աճյունով նկարած նկարիչը կկանգնի դատարանի առջեւ

Լեհաստանի իշխանությունները դատի են տվել շվեդ գեղանկարիչ Կառլ Միխայել ֆոն Հաուսվոլֆին, որը խոստովանել էր, որ իր նկարներից մեկը, որը ցուցադրվում է Լունդ քաղաքի պատկերասրահում, նկարել է Մայդանեկի համակենտրոնացման ճամբարի վառարաններից վերցրած մրով: Նկարչին ներկայացվելու է մարդկային աճյունը անարգելու մեղադրանք, եւ նրան սպառնում է 2-8 տարվա բանտարկություն. տեղեկացնում է BBC-ն:

Հասարակության վրդովմունքի արդյունքում Լունդի ցուցադրությունը փակվել է: Շվեդիայի հրեական համայնքի ղեկավար Սողոմոն Շուլմանը նկարչի արարքը որակել է «արգահատելի», իսկ Մայդանեկի համկենտրոնացման ճամբարի տեղում գործող թանգարանի տնօրենը դիակիզարանից մուր առեւանգելը կոչել է «աներեւակայելի բարբարոսություն»:

Հաուսվոլֆը մուրը գողացել էր 1989 թվականին, նկարում օգտագործել` 2010-ին: