Երկրների սահմանները հատելու առումով «ամենաազատները» 2017-ին կլինեն Գերմանիայի քաղաքացիները

Երկրների սահմանները հատելու առումով «ամենաազատները» 2017-ին կլինեն Գերմանիայի քաղաքացիները, որոնք կարող են առանց մուտքի արտոնագրի այցելել աշխարհի 157 երկիր:

Այս մասին գրում է Euromag-ը` նշելով, որ ևս 9 եվրոպական երկրներ հայտնվել են վարկանշային աղյուսակի վերին հորիզոնականներում: Տարիներ շարունակ ամենահաջողակ ճանապարհորդողների թվում են եվրոպական դիվանագիտության ներկայացուցիչները:

Գերմանացիներին հետևում են Շվեդիայի և Սինգապուրի քաղաքացիները, որոնց անձնագրերը թույլ են տալիս առանց մուտքի արտոնագրի այցելել 156 երկիր:

Երրորդ հորիզոնականում հայտնված 8 երկրից 7-ը եվրոպական են: ԱՄՆ-ի բնակիչներից բացի, 155 երկիր ազատ կարող են այցելել Դանիայի, Ֆինլանդիայի, Ֆրանսիայի, Շվեյցարիայի, Նորվեգիայի և Մեծ Բրիտանիայի քաղաքացիները:

Չորրորդ տեղը կիսել են Իտալիան, Նիդերլանդները, Բելգիան, Ավստրիան, Լյուքսեմբուրգը, Պորտուգալիան և Ճապոնիան, որոնց քաղաքացիները կարող են ազատ այցելել 154 երկիր:

Մալայզիայի, Իռլանդիայի, Կանադայի և Նոր Զելանդիայի քաղաքացիներին հնարավորություն է տրվում այցելել 153 երկիր:

Ռուսական անձնագիրը 40-րդ տեղն է զբաղեցնում, որը թույլ է տալիս առանց մուտքի արտոնագրի այցելել 103 երկիր: Թուրքական անձնագիրը 39-րդ տեղում է (104 երկիր):

Աղյուսակի վերջին 95-րդ հորիզոնականը զբաղեցնում է Աֆղանստանի անձնագիրը` 23 երկիր այցելելու իրավունքով: