Մոտ մեկ միլիոն դրամ սեփական գրպանից՝ ասուլիսի կազմակերպման համար

Այսօր ՀՀ տրանսպորտի, կապի և ՏՏ նախարար Վահան Մարտիրոսյանն ամփոփեց 2016 թվականը և իր աշխատանքի երեք ամիսը: Նա նախ նշեց, որ նախարարությունը տարբեր գործընթացների արդյունքում տնտեսել է 740 միլիոն դրամ, որի արդյունքը տեսանելի կլինի 2017-ին:

Նշենք, որ ասուլիսը տեղի էր ունենում ոչ թե նախարարությունում, այլ «Արմենիա Մարիոթ» հյուրանոցի «Տիգրան Մեծ» սրահում՝ ֆուրշետով:

Լրագրողները հետաքրքրվեցին` այդ ի՞նչ միջոցներով է վարձակալվել ամենաթանկ հյուրանոցներից մեկի սրահը: Նախարարը պատասխանեց, որ իր անձնական միջոցներով է վարձակալել, քանի որ նախարարությունը տեղ չի ունեցել` լրատվամիջոցների մեծաթիվ ներկայացուցիչներին տեղավորելու համար:

«Իմ անձնական միջոցներից վճարել եմ 888 հազար դրամ այս սրահի և ֆուրշետի համար: Նախընտրել եմ այս դահլիճը, որ ավելի ազատ լինենք, ավելի լավ պայմաններ լինեն լրագրողների համար: Սա իմ անձնական որոշումն է եղել: Եթե ուզում եք, կարող եմ ներկայացնել իմ քարտային վճարը»,- ասաց նախարարը:

Լրագրողների հարցին, թե եթե նման միջոցներ ունի, որ կարող է թանկարժեք սրահ վարձակալել, ուրեմն նրա ինչի՞ն է պետք նախարարի պաշտոնը:

Նախարարը պատասխանեց, որ ինքը մինչև նախարար դառնալը հաջողությունների է հասել բիզնեսում և ստացել իր գիտելիքներն ու կարողությունները պետական պաշտոնում օգտագործելու  հնարավորություն: «Ժամանակի ընթացքում դուք կգնահատեք իմ կատարած աշխատանքը»,- ասաց Մարտիրոսյանը: