Ծննդատանը ինքնասպան եղած տղամարդու գրպանից ևս մեկ զենք է հայտնաբերվել

Այսօր առավոտյան Հանրապետական ծննդատանը տեղի ունեցած միջադեպի փաստով ՀՀ Քննչական կոմիտեում հարուցվել է քրեական գործ` ՀՀ Քրեական օրենսգրքի երկու` սպանության փորձի և ապօրինի զենք-զինամթերք պահելու հատկանիշներով:

Ծննդատնից Yerkir.am-ի լրագրողը հայտնում է, որ դեպքի վայրում հայտնաբերվել է երկու ատրճանակ, մեկը` ամուսնու` Արա Վարդանյանի գրպանից:

Ըստ նախնական տեղեկությունների`տղամարդը նոր էր վերադարձել արտագնա աշխատանքից: Ծննդաբերելուց հետո կինը տեղափոխվել է վճարովի պալատ, որտեղ էլ տեղի է ունեցել դեպքը: Ըստ նախնական վարկածի` կինը նստած է եղել բազկաթոռին, երբ ամուսինը կրակել է նրա վրա:

Ի դեպ, հիվանդասենյակում նաև ծաղիկներ էին դրված, որոնք, հավանաբար, նրան նվիրել էին երեխա ունենալու կապակցությամբ: Հիշեցնենք, որ դեպքի պահին երեխան հիվանդասենյակում չի եղել: