Սա շատ կարևոր պահ է` ցույց տալու, որ արդարության կողմնակից են. Ատոմ Էգոյան

ՀՀ քաղաքացիները պետք է անեն ամեն ինչ` իրենք իրենց կրթելու, իրենց քվեին տեր լինելու և, որպես քաղաքացի, իրենց ուժը գիտակցելու համար. այսօր հրավիրված մամուլի ասուլիսում ասաց կանադահայ կինոռեժիսոր Ատոմ Էգոյանը` խոսելով «Արդարություն Հայաստանում» նախաձեռնության մասին:

Նա նշեց, որ ՀՀ քաղաքացին պետք է փոխի իր ընկալումը պատասխանատվության հանդեպ: «Պետք չէ խնդիրը միայն դրսից դիտել, պետք է նաև ներսի հայացքով գնահատել իրավիճակը: Մենք էլ մեր հերթին պետք է դրսից ամեն ինչ անենք` օգտագործելով բոլոր հնարավոր միջոցները, որպեսզի դա իրագործելի դարձնենք: Պետք է կարողանանք կրթել ՀՀ քաղաքացիներին` ճիշտ քվեարկել»,-ասաց Էգոյանը:

Նա հավելեց նաև, որ իրենք ուզում են ցույց տալ, որ միասնական են և ցանկանում են գործուն մասնակցություն ունենալ ՀՀ ընտրական գործընթացում: «Ճիշտ է, չենք կարող քվեարկել, բայց նրանք, ովքեր երկքաղաքացիություն ունեն, պետք է գան ու քվեարկեն: Սա շատ կարևոր պահ է` ցույց տալու, որ իրենք արդարության կողմնակից են»,- ասաց Էգոյանը: