Պահեստազորային գումարտակի անհրաժեշտություն միանշանակ կա. Արթուր Եղիազարյան

Արդեն հայտնի է, որ ՀՅԴ Գերագույն մարմնի ազատամարտիկների հանձնախումբը պահեստազորային գումարտակ ստեղծելու նպատակով զինակոչ էր հայտարարել: Նշվել էր, որ գումարտակը ստեղծվելու է  ՊՆ-ի համաձայնությամբ:

Գումարտակի անհրաժեշտության, կազմավորման  ընթացքի և այլ հարցերի շուրջ Yerkir.am-ը զրուցել է պահեստազորի սպա, ազատամարտիկ, ապրիլյան պատերազմի կամավորական, դաշնակցական Արթուր Եղիազարյանի հետ, ով նույնպես դիմել է` անդամակցելու ՀՅԴ պահեստազորային գումարտակին:

Ըստ նրա` այս գումարտակի անհրաժեշտությունը միանշանակ կա: «1994 թվականին կնքվեց  հրադադար, բայց դա դեռ հաշտություն չէր, ընդամենը զինադադար էր, որը կարող է խախտվել ցանկացած ժամանակ: Հետևաբար` նոր, լայնամասշտաբ պատերազմի պարագայում պետք է ունենալ արդյունավետ գործող պաշտպանություն: Մենք, իհարկե, տարիներով պահեստազոր ունեցել ենք, բայց ճիշտ չի օգտագործվել այն, և ապրիլյան դեպքերը ցույց տվեցին, որ մենք պետք է ունենանք մշտապես գործող, կազմ ու պատրաստ պահեստազոր»,- նշեց մեր զրուցակիցը` հավելելով` ուստի ՀՅԴ ազատամարտիկների հանձնախումբը, պետության հետ համագործակցելով, աշխատանք տարավ`պաշտպանության շտաբի ենթակայության տակ ձևավորելու կամավորականների պահեստազորային գումարտակ:

Եղիազարյանը նշեց, որ այս պահի դրությամբ 650-ից ավելի մարդ է դիմել` գումարտակին մաս կազմելու համար: «Աշխատանքները բնականոն շարունակվում են, պահեստազորային այս գումարտակը կունենա կայուն` 400-500 հոգանոց կազմ, բայց այդ 400-500 հոգին էլ պետք է իրենց հերթափոխներն ունենան: Այսինքն` թվաքանակը շատ ավելի մեծ կարող է լինել, և սահմանափակում չկա, ովքեր անդամակցելու ցանկություն են հայտնում, բոլորին այս պահին ցուցակագրում են, որից հետո պետք է լինի, այսպես ասած, զտման աշխատանքը: Կան մարդիկ, որ ցանկանում են անդամագրվել, բայց պետք է նայել մարդու առողջական վիճակը, ռազմական գործին տիրապետելը, այսինքն` համադրման բազմաթիվ աշխատանքներ կան, որովհետև գումարտակը պետք է ունենա իր ստորաբաժանումները, որտեղ պետք է հստակ լինի` գնդացրորդ, հրաձիգ, նռականետորդ և այլն: Պետք է ստեղծենք այդ ստորաբաժանումները` մարդկանց վերապատրաստելով»,- ասաց նա:

Խոսելով տարիքային շեմի մասին` մեր զրուցակիցը նշեց, որ սկզբնական շրջանում սահմանվել էր մինչև 35 տարեկանը, բայց քանի որ շատ են 35 տարեկանից մեծ դիմողները, տարիքային շեմը բարձրացվեց մինչև 45 տարեկանը:

Եղիազարյանը հայտնեց, որ ինքն էլ է դիմել, որպեսզի անդամակցի գումարտակին: «Ես անդամակցում եմ տվյալ գումարտակին, ունեմ բավական մեծ զինվորական փորձառություն: Հիմա դիմել եմ անդամակցելու համար, հետագայում երբ որ հանձնախումբը սկսի իր ստորաբաժանումների կազմավորման գործընթացը, կերևա իմ դերը տվյալ գումարտակի կազմում»,- ասաց նա:

Խոսելով գումարտակի նպատակի մասին` մեր զրուցակիցը հայտնեց, որ այն պահեստազորային է լինելու և մշտապես զորավարժանքներ, պարապմունքներ է անցկացնելու: «Պաշտպանության նախարարության համապատասխան զորավարժարան կտրամադրվի, որտեղ պարբերաբար կիրականացվեն մարզումները: Այնուհետև ՊՆ գլխավոր շտաբը գումարտակին կտա հստակ պաշտպանական տարածք, ուր ժամանակ առ ժամանակ գումարտակը կայցելի` տեղանքն ուսումնասիրելու, ծանոթանալու համար, որ հետագայում` լայնամաշտաբ պատերազմների կամ ապրիլյան դեպքերի նման գործողությունների ժամանակ, գումարտակը հստակ ունենա իր դերը, այսինքն` այդ ժամանակ անծանոթ չի լինի` որտեղ պետք է մարտական գործողություն իրականացնել»,- նշեց Եղիազարյանը:

Ըստ նրա` գումարտակն առաջին հերթին անհրաժեշտ է նրա համար, որ ժամանակի կորուստ չլինի:  «Ապրիլյան դեպքերը ցույց տվեցին, որ ժամանակի բավականին կորուստ կար. մինչև կազմակերպվեց պահեստազորը, հագուստ, զենք ստացավ  և այլն, բավականին ժամանակ պետք եկավ: Իսկ ՀՅԴ պահեստազորային  գումարտակը միշտ կունենա իր զինային և հանդերձանքային միջոցները, և երբ արդեն ահնրաժեշտ լինի, գումարտակում ընդգրկված մարդիկ կիմանան, ուր են գնում, որտեղից են ստանում իրենց զենքն ու հագուստը, և արդեն ժամեր անց, առանց ժամանակի կորստի, պատրաստ կլինեն մասնակցել մարտական գործողություններին»,- ասաց Եղիազարյանը:

Նրա խոսքով` քանի որ գումարտակը ՊԲ շտաբի ենթակայության տակ է, ապա զորավարժություններ գումարտակի հետ կանցկացնեն նաև ՊԲ մասնագետները:  «Այս գումարտակում ընդգրկված մարդիկ  տարվա մեջ պարբերաբար պարապմունքներ են անցկացնելու, այսինքն` առօրյա կյանք վերադանալով էլ` չեն կտրվում ռազմական գործից: Նրանք մշտական պարապունքների են մասնակցելու` նորմայի մեջ, պետք է լինեն կազմ ու պատրաստ»,- ասաց Եղիազարյանը:

Ի դեպ՝ դեռևս 2012 թվականին Արթուր Եղիազարյանը բաց նամակով դիմել էր ՀՀ այն ժամանակվա պաշտպանության նախարար Սեյրան Օհանյանին՝ նշելով կամավորական պահեստազորի անհրաժեշտության մասին: «Հարգարժան պարոն Օհանյան, այն իրավիճակը, որ ստեղծվել է ՀՀ հյուսիս-արևելյան սահմանների մոտ, ստիպում է, որ Ձեզ դիմեմ կարճ խնդրանք-առաջարկով: Հին սպարտացիների պես, հանուն ազգի առողջ գենոֆոնդի (18-20 տարեկան զորակոչիկների) պահպանման, մեզ, այն պահեստային զինվորականներիս, որոնք որպես կամավորականներ ցանկանում են, ֆիզիկապես կարողունակ են և ունեն տված սերունդ, որպես իրավիճակային արագ արձագանքման զինվորականների` զորակոչել և ուղարկել ռազմասահմանագիծ, մինչև որ այնտեղ կրկին կվերականգնվի հարաբերական անդորրը: Ես ներկայումս քաղաքացիական ծառայող եմ, բայց պատրաստ եմ մշտապես մասնակցել պլանային և ֆիզիկականվերականգնողական վարժանքների և նման իրավիճակների առաջացման դեպքում մեկնել վտանգավոր սահմանահատվածները` մեր ողջ ուժն ու գիտելիքները կրկին ի սպաս դնելով հանուն հավիտենական արժեքների` Ազգի և Հայրենիքի պաշտպանության: Մենք պետք է լինենք Ազգ - Բանակ: Կարծում եմ, որ այս հարցում ունեմ համախոհներ և իրավունք եմ ինձ վերապահում հանդես գալու Ազգի այդ հատվածի անունից: Խնդրում եմ մտածել ասածիս ուղղությամբ և այս խնդրի իրագործման գործնական տարրերի ներդրման հարցում պատրաստ եմ համագործակցել: Պատիվ ունեմ: Հարգանքով` Հայոց Բանակի պահեստազորի սպա, կապիտան Եղիազարյան»: