Խումբ է ուղևորվել Պառավաքար՝ մոնիթորիգ իրականացնելու

ՀՀ տեղական ինքնակառավարման համակարգի ձևավորման 20-ամյակի կապակցությամբ կազմակերպված միջոցառման ընթացքում Պառավաքարի գյուղապետ Ռոլանդ Մարգարյանը պարգևատրվեց երախտագիտության մեդալով:

Միջոցառման ժամանակ Մարգարյանը Սերժ Սարգսյանին ինչ-որ բան ասաց, որից հետո Սարգսյանը հայտարարեց. «Գյուղապետը էսպես պետք է լինի` էս պահն էլ է օգտագործում, ծրագիր է բերում»:

Ի դեպ, Պառավաքարի գյուղապետը լրագրողների հետ զրույցում տեղեկացրեց, որ նախագահին ներկայացրել է խմելու ջրագծի ներքին ցանցի հետ կապված ծրագիրը, ինչին ի պատասխան նախագահն ասել է. «Վաղը կզանգես, կիմանաս՝ երբ կարող ենք էդ ծրագիրն իրականացնել»: Գյուղապետի խոսքով՝ ջրագիծը 27 կմ երկարություն ունի, և վերանորոգման անհրաժեշտություն կա:

Պառավաքարի գյուղապետն այսօր Yerkir.am-ի հետ զրույցում  տեղեկացրեց, որ պարգևատրման հաջորդ իսկ օրն իրենց գյուղ խումբ է գնացել՝ մոնիթորինգ իրականացնելու:

«Զանգեցի նախագահի աշխատակազմին, հենց հաջորդ օրը խումբ ուղարկեց մեր գյուղ, եկան, մոնիթորինգ արեցին: Պետք է նախագիծ լինի: Դրա համար երևի մի երկու ամիս պետք է: Տեսնենք»,- ասաց Մարգարյանը: