Գոնե մի անգամ Պերմյակովին հանեք ռազմաբազայի տարածքից. ինչո՞ւ ռուս զինծառայողին չեն բերել Երևան

Քիչ առաջ վերաքննիչ քրեական դատարանում մեկնարկեց Գյումրիում Ավետիսյանների ընտանիքի 7 անդամների սպանության գործով տուժողի իրավահաջորդների ներկայացուցիչների վերաքննիչ բողոքի քննությունը:

Նախքան նիստի մեկնարկը նախագահող դատավոր Մհեր Արղամանյանն առաջարկեց մեկ րոպե լռությամբ հարգել Ավետիսյանների հիշատակը:

Այսօրվա նիստին դատարան չէր ներկայացել գործով ցմահ ազատազրկման դատապարտված ռուս զինծառայող Վալերի Պերմյակովը: Նա դիմում էր ներկայացրել դատարանին` խնդրելով բողոքը քննել իր բացակայությամբ:

Դատարան ներկայացած` ամբաստանյալի պաշտպան Էդուարդ Աղաջանյանն ասաց, որ Պերմյակովն իրեն չի լիազորել վերաքննիչում ներկայացնել իր շահերը, և ինքը չգիտի` իր պաշտպանյալը ցանկանո՞ւմ է, որ ինքը ներկայացնի նրա շահերը, թե՞ ոչ:

Նշենք որ այս գործով վերաքննիչ բողոք են ներկայացրել գործով տուժողների իրավահաջորդների ներկայացուցիչներ Արթուր Սաքունցը, Արայիկ Զալյանն ու Արամազդ Կիվիրյանը: Մասնավորապես` Սաքունցն ու Զալյանը պահանջում են ամբողջությամբ բեկանել և փոփոխել Շիրակի մարզի ընդհանուր իրավասության դատարանի` Վալերի Պավելի Պերմյակովի նկատմամբ կայացրած դատավճիռը և գործն ուղարկել համապատասխան ստորադաս դատարան` նոր քննության: Արամազդ Կիվիրյանը նույնպես պահանջում է բեկանել դատավճիռն ու գործն ուղարկել ստորադաս դատարան նոր քննության՝ տուժողների իրավահաջորդներ Լուսինե Ավետիսյանի, Անահիտ Կոշտոյանի, Անդրանիկ Պողոսյանի, Նարինե Պողոսյանի հայցն ընդդեմ Ռուսաստանի Դաշնության` ոչ նյութական վնասի հատուցման պահանջի մասին քննելու համար:

Նշենք, որ Պերմյակովը հետ է վերցրել իր պաշտպանյալի ներկայացրած բողոքը, որով պահանջվում էր բեկանել և փոփոխել Շիրակի մարզի ընդհանուր իրավասության դատարանի` Վալերի Պերմյակովին ցմահ ազատազրկման դատապարտելու վերաբերյալ` օգոստոսի 23-ի դատավճիռը, նրա նկատմամբ ՀՀ քր.օր. 34-329 հոդ. 1-ին մասով քրեական հետապնդումը դադարեցնել: Պերմյակովի նկատմամբ նշանակել համաչափ մեղմ պատիժ: Նշենք, որ այս հոդվածը վերաբերում է պետական սահմանն ապօրինի հատելու փորձին:

Այսօրվա նիստում տուժողի իրավահաջորդի ներկայացուցիչներից Արթուր Սաքունցը ցանկանում էր ինքնաբացարկ հայտնել մեղադրող դատախազ Գևորգյանին, սակայն, քանի որ հարցականի տակ է պաշտպանի կարգավիճակը, առանց պաշտպանական կողմի դիրքորոշման չեն կարող որևէ հարց քննել:

Աղաջանյանն առաջարկեց դատարանին` ապահովել Պերմյակովի ներկայությունը: Այս կապակցությամբ մեղադրողը նշեց, որ եթե անձը չի ցանկանում ներկայանալ, ինչպե՞ս են բերելու: Տուժողի իրավահաջորդի ներկայացուցիչներից Արայիկ Զալյանը նշեց, որ Պերմյակովին պետք է բերել դատարան: Փաստաբան Արթուր Սաքունցն էլ ասաց, որ վերաքննիչը եզակի հնարավորություն է Պերմյակովին ՀՀ դատարան բերելու համար: Ըստ նրա` դատարանը պետք է նրան գոնե մեկ անգամ ռուսական բազայի տարածքից հանելու որոշում կայացնի:

Դատավոր Մխիթար Պապոյանը նշեց, որ ինքը բոլորից շատ է ուզում ապահովել Պերմյակովի ներկայությունը, սակայն իրենք նրան ստիպողաբար բերելու իրավասություն չունեն: Այսպիսով` դատարանը որոշում կայացրեց հետաձգել այսօրվա նիստն ու մեկ անգամ ևս ծանուցել ռազմաբազայի հրամանատարությանը` ապահովել Պերմյակովի ներկայությունը դատական նիստին: