Վարչապետը նախաձեռնում է վերացնել կոռուպցիոն երևույթները հանրակրթական դպրոցներում

Կառավարության նիստում օրակարգին անցնելուց առաջ ՀՀ վարչապետ Կարեն Կարապետյանը անդրադարձավ մի քանի նոր հանձնարարականների: Դրանցից մեկը վերաբերում էր ԿԳՆ ոլորտին, մասնավորապես՝ հանրակրթական ոլորտում առկա որոշ հնարավոր կոռուպցիոն ռիսկերին:

«Հանձնարարում եմ ԿԳ նախարարին, բոլոր մարզպետներին, Երևանի քաղաքապետին` 7-օրյա ժամկետում ներկայացնել առաջարկություններ հանրակրթական հաստատությունների ընտրության գործընթացում ազգակցական կապերի, հովանավորչության և շահերի բախման երևույթների բացառման ուղղությամբ: Բոլորդ շատ լավ հասկանում եք, թե ինչի մասին է խոսքը: Մայր և աղջիկ նույն դպրոցում և այլն: Չեմ բացառում, որ նման դեպքեր կլինեն: Պետք է տարբերակել` որ դեպքն է օբյեկտիվ, որը՝ սուբյեկտիվ»,- ասաց վարչապետը: