Թմրամոլների թիվն ավելանում է նաև Հայաստանում

Ինչպես ամբողջ աշխարհում, թմրամոլությունը տարածված է նաև Հայաստանում, և ոչ մի երկրում դեռևս չեն կարողանում կանգնեցնել դրա աճը. լրագրողներին այսօր ասաց  ՀՀ ԱՆ գլխավոր նարկոլոգ Պետրոս Սեմերջյանը։։

Ըստ նրա` թմրամոլությունը, թմրամիջոցների ապօրինի շրջանառությունը բացառիկ ոլորտներից են, որոնց վերաբերյալ ՄԱԿ-ն ընդունել է 3 կոնվենցիա։ Հայաստանի Հանրապետությունը վավերացրել է դրանք 1993թ.-ին:

«Թմրամոլությունն ինչպես ամբողջ աշխարհում, նաև Հայաստանում ունի աճի միտում: Ոչ մի երկիր չի կարողանում կանխել  թմրամոլության աճը, միայն Շվեդիան է հայտարարել, որ իր երկրում կարողացել են կանգնեցնել այդ աճը։ Ըստ ՀՀ ԱՆ նարկոլոգիական ծառայության` 2016 թ. հունվարի 1-ի  վիճակագրության՝ 5828 թմրամոլ է հաշվառված նարկոլոգիական ծառայությունում։ Ավելի շատ են օգտագործում թմրամիջոց 25-ից 45 տարիքային խմբերում, կանայք 5828  թմրամոլից 88-ն են։  Համեմատ հարևան երկրների հետ` մենք գտնվում ենք բարվոք վիճակում։ Թմրամոլության վերաբերյալ միջազգային հանդիպման ժամանակ, երբ խոսում ենք 30 000 հոգի թմրամոլ ունենալու մասին, Վրաստանը խոսում է 400 000 հոգու մասին»,- ասաց Սեմերջյանը:

Նա հավելեց, որ  Հայաստանում թմրամոլությունը, անցյալ տարվա համեմատ, աճել է 9 տոկոսով։ Այս տարվա տվյալներով` ՀՀ ում 493 հոգի գրանցվել է նարկոլոգիական կենտրոնում՝ բուժման համար։