«Հյուսիս-հարավ»-ի հետ կապված նոր մոտեցումներ կլինեն. նախարար

Տրանսպորտի և կապի նորանշանակ նախարար Վահան Մարտիրոսյանն այսօր Ազգային ժողովում լրագրողներին ասաց, որ հանդիպել է տաքսիստների հետ՝ քննարկելու նրանց բարձրացրած խնդիրները: Անդրադառնալով հարցին, թե Yandex, GG տաքսիներն աշխատում են առանց լիցենիայի, այսինքն՝ ավելի մատչելի են, և սա խնդիր է դառնում, նախարարն ասաց. «Ես իմ հայտարարությունն արել եմ, որ բոլորին պետք է բերել օրինական դաշտ, որ բոլորը լիցենզավորվեն: Իհարկե, կլինեն դժգոհողներ, որովհետև շատերն աշխատում են առանց լիցենզիայի, ու ես այստեղ ձեր աջակցությունն եմ ակնկալում, որովհետև դուք եք ձևավորում հանրային կարծիքը»:

Նախարարը նշեց նաև, որ տաքսիների ղեկավարների հետ էլ է ընդհանուր ժողովում հանդիպել, բայց հենց Yandex-ի տնօրենին չի հանդիպել, սակայն, նախարարի խոսքով, այս խնդիրներն ընդհանուր պետք է լուծվեն ու կլուծվեն:

Հարցին՝ Yandex-ի գործելաոճը դեմպինգ չէ՞, Մարտիրոսյանը պատասխանեց. «Չեմ կարող ասել, որովհետև ամբողջապես չեմ ուսումնասիրել խնդիրը»:

Անդրադառնալով «Հյուսիս-հարավ» ճանապարհի հետ կապված նոր մոտեցումներին, նախարարն ասաց. «Հյուսիս-հարավ»-ի հետ կապված` պետք է գնահատենք արդյունավետությունը: Իհարկե, նոր մոտեցումներ կլինեն»: