Տեղի է ունեցել հանցագործություն. իրավաբանը՝ զինված խմբի գործողությունների մասին

Այսօր լրագրողների հետ հանդիպման ժամանակ միջազգային իրավունքի մասնագետ Արա Ղազարյանը խոսեց այն մասին, թե օրենքով հնարավոր ինչ պատիժ կկրեն ՊՊԾ գունդը գրավողները՝ «զինյալներ», «ապստամբներ» և կամ «ահաբեկիչներ» ճանաչվելու դեպքում:

Արա Ղազարյանը նշեց, որ կարող է խոսել հանցադեպի մասին, այլ ոչ` հանցակազմի: Կա գործողություն` պատանդ վերցնել, շենք-շինություն գրավել, մահ պատճառել, առողջությանը վնաս պատճառել, անօրինական զենք-զինամթերք պահել, որոնք հանցագործություն են, գործողությունն ուղղված է որևէ մեկի կամ խմբի դեմ, և այդ գործողությունն ունի նպատակ` ստիպել պետական մարմնին կատարել որոշակի գործողություն:

Տեղի ունեցածը, ըստ Արա Ղազարյանի, տեղավորվում է այն քրեական հոդվածներում, որոնք վերաբերում են հասարակական անվտանգության բաժնին, այսինքն միջադեպը դիտարկվում է, որպես հանրության անվտանգության դեմ կատարված գործողություն:

«Ահաբեկչություն է, թե ոչ, դա ավելի շատ բարոյական դաշտ է տանում, որովհետև ոչ ոք չի ուզում կոչվել ահաբեկիչ: Կարծիքներ են հնչում, որ իշխանությունը կարող է գնալ կոմպրոմիսի, և այդ մարդիկ թող ազատ արձակվեն, բայց ինչպես՞, բա սոցիալական արդարությունը, բա տուժողներին ի՞նչ պատասխան պետք է տանք, մարդ է սպանվել, չէ՞:Խմբի անդամներից մեկն ասում է` պատանդ բառը մի ասեք, մենք իրենց լավ ենք նայում: Եղբայր, դու մարդուն ազատությունից ես զրկել, և դեռ ուզում ես, որ չդատապարտե՞նք այդ արարքը, շնորհակալություն հայտնե՞նք»,- ասաց Արա Ղազարյանը:

Նա նաև աբսուրդ համարեց հնարավորությունը` ազատ արձակել նրանց քաղաքական որոշման արդյունքում: Տեղի է ունեցել հանցագործություն, այլ բան է, որ այդ մարդկանց համար պետք է ապահովվի արդար դատավարություն:

Իրավաբանի համոզումն է, որ չափազանց վտանգավոր է նման եղանակով որևէ բան փոխելը: Հետաքրքրական է, որ նման անօրինական եղանակը թեև չի խրախուսվում, բայց միևնույն ժամանակ լռությամբ ընդունվում է ազգային-ազատագրական պայքարի շրջանակներում: «Չեգեվարան համարվում է ազատության մարտիկ, մինչ հիմա նրա նկարներն ամենուր են, նա խորհրդանիշ է, բայց նա անմեղ մարդկանց կյանքեր է խլել,  եղել է դաժան անձնավորություն: Դա կյանքի դիլեմա է ամբողջ աշխարհում: Ես որպես իրավաբան, չեմ կարող արդարացնել մի բան, որը մարդու հիմնարար իրավունքներին դեմ է»,- ասաց Արա Ղազարյանը:

Նա հավելեց, որ մարդկությունը մշակել է քաղաքական պայքար, որը կարող է հազարավոր ծալքեր ունենալ, բայց ՊՊԾ գունդը գրավելը լեգիտիմություն չունի, ահա ինչու կուսակցությունները հրապարակայնորեն իրենց աջակցությունը չհայտնեցին զինված խմբին:

«Ո՞ր կուսակցությունը կհայտարարի` ես կողմ եմ, որ գրավել են ՊՊԾ գունդը, կարող է շշուկով հարևանին ասեն, բայց հրապարակայնորեն ոչ ոք չի ասի: Նիկոլ Փաշինյանն էլ բռնությունը չի արդարացրել»,- ասաց Արա Ղազարյանը: