Երկու գերհզոր երկրների նախագահների կրիտիկական զրույցը. թուրքական ԶԼՄ-ները՝ Օբամա-Պուտին զրույցի մասին

Տեղեկացրեցինք, որ ԱՄՆ նախագահ Բարաք Օբաման հեռախոսազրույց է ունեցել ՌԴ նախագահ Վլադիմիր Պուտինի հետ, որի ընթացքում պատրաստակամություն է հայտնել ակտիվացնել ԱՄՆ-ի ջանքերը` ուղղված ԼՂ հակամարտության կարգավորմանը:

Թուրքական կայքերը լայնորեն անդրադարձել են երկու նախագահների միջև տեղի ունեցած հեռախոսազրույցին:

«Երկու գերհզոր երկրների նախագահների կրիտիկական զրույցը» վերնագրված հրապարակման մեջ Haberler-ը նշել է, որ այն տեղի է ունեցել Հայաստանի և Ադրբեջանի նախագահների հանդիպումից առաջ:

Ahaber-ը նույնպես անդրադարձել է նախագահների զրույցին՝  նշելով, որ նրանք քննարկել են նաև Սիրիայի, ահաբեկչական խմբավորումների և Ուկրաինայի վերաբերյալ մի շարք հարցեր:

Ուշագրավ է, որ ԶԼՄ-ներից շատերը նախագահների զրույցի մասին լուրերը հրապարակել են «Օբաման և Պուտինը զրուցել են Սիրիայի խնդրի մասին» վերնագրով՝ փորձելով «ոչ օրակարգային» ներկայացնել ԼՂ հակամարտության կարգավորման հարցը:

Հիշեցնենք, որ նախագահների հեռախոսազանգի մասին Սպիտակ տունը հայտարարություն է տարածել, որում, մասնավորապես, նշվել է. «Նախագահ Օբաման պատրաստակամություն է հայտնել ակտիվացնել ԵԱՀԿ Մինսկի խմբի համանախագահներ Ռուսաստանի եւ Ֆրանսիայի հետ համատեղ ջանքերը՝ հակամարտության համապարփակ կարգավորմանը հասնելու համար»: