Բանակցելն ավելի լավ է, քան չբանակցելը. Շարմազանով

Ադրբեջանական կողմը շարունակում է ոչ կառուցողական հայտարարություններ անել` նախագահի մակարդակով. ԱԺ-ում լրագրողների հետ զրույցում ասաց ԱԺ փոխխոսնակ Էդուարդ Շարմազանովը` անդրադառնալով Պուտին-Սարգսյան-Ալիև հանդիպմանը:

«Եվ ես չեմ կարծում, որ նման էմոցիոնալ, իրականությունից հեռու գնահատականները օժանդակում են բանակցային պրոցեսների վերսկսմանը և բանակցային պրոցեսի առաջընթացին»,- ասաց նա:

Ըստ Շարմազանովի` եթե կողմերն ուզում են առաջընթաց, նախևառաջ պետք է կարողանան հարգալել ընդունված սկզբունքները: 

Անդրադառնալով բանակցությունների արդյունավետության հարցին` նա ասաց. «Բանակցելն ավելի լավ է, քան թե չբանակցելը: Յուրաքանչյուր բանակցություն` թեկուզ ոչ շատ արդյունավետ, փաստում է այն մասին, որ հույս կա` բանակցությունները վերսկսելու, խաղաղ ճանապարհով խնդիրը լուծելու»:

Ինչ վերաբերում է Ղարաբաղը բանակցային կողմ դարձնելուն, Շարմազանովը ճիշտ չի համարում դուռը շրխկացնելն ու գնալը, և որ դա դեմարշ կլինի:

«Պետք է աստիճանաբար աշխատել և հասնել այն բանին, որ Ղարաբաղը դառնա բանակցային կողմ: Իհարկե, Ղարաբաղը մասնակցում է բանակցություններին, սակայն մենք պետք է ձգտենք նրան, որ Ղարաբաղը դառնա բանակցային լիարժեք կողմ: Առանց Ղարաբաղի` անհնար է լուծել այս խնդիրը, որովհետև եթե մենք խոսում ենք 94 թվականի անժամկետ զինադադարի մասին, ապա պետք է ասենք, որ 94 թվականի զինադադարը կնքել է ԼՂՀ-ն»,- ասաց ԱԺ փոխխոսնակը:

Անդրադառնալով համացանցում շրջանառվող` ապրիլյան դեպքերի մասին տեսանյութին, Շարմազանովը նշեց, որ տեսանյութը հրապարակելը սխալ էր: «Ես դեմ եմ կոծկմանը, բայց միշտ չէ, որ այդպիսի տեսանյութերի տարածումը նպաստում է ինչ-որ խնդիրների լուծմանը. խնդիրներ կան, որոնք մենք այլ ձև պետք է լուծենք»,- ասաց նա: