Աշնանից կսկսվի բուռն, լարված, նախընտրական շրջան. Աղվան Վարդանյան

Այսօր խորհրդարանական ճեպազրույցներում ԱԺ ՀՅԴ խմբակցության քարտուղար Աղվան Վարդանյանը, անդրադառնալով հերթական քառօրյայի աշխատանքին, կատակեց` ասելով, որ լրագրողները ևս մեկ ծանր փորձություն ավարտեցին՝ հերթական քառօրյան, և հուսով է, որ վնասվածք ստացած լրագրողներ չեն եղել:

«Ավելի հանգիստ նստաշրջան էր, իսկ աշնանից կսկսվի բուռն, լարված, նախընտրական շրջան»,- ասաց նա:

Հարցին` իսկ այս քառօրյայի ընթացքում եղա՞ն քաղաքական գործիչներ, որոնք վնասվածք ստացան, Աղվան Վարդանյանը պատասխանեց, որ քաղաքական գործիչները վնասվածքներ են ստանում ամեն օր` իրենց ամենօրյա գործունեության ընթացքում, իրենց հայտարարություների, վարվելակերպի, հայտարարությունների առումով:

«Վերջին շրջանում քաղաքական մթնոլորտը մի փոքր ավելի լարված է դարձել, որոշ քաղաքական ուժեր դեռ երկու տարի առաջ են սկսել իրենց նախընտրական քարոզչությունը: Մենք կարծում ենք, որ միշտ չէ, որ շատ խոսելը, անընդհատ հարցեր բարձրացնելը արդյունավետ եղանակ է, գերադասում ենք հանգիստ ու ծանրակշիռ աշխատելու տարբերակը: Կարծում եմ` քաղաքական ուժերը ժամանակ առ ժամանակ վնասվածք ստանում են, այնպես որ` մեր գործն ավելի բարդ է, քան լրագրողներինը»,- ասաց նա:

Լրագրողները կրկին հարցրեցին, թե արդյո՞ք Դաշնակցությունը վնասվածք ստացել է Հանրապետական կուսակցության հետ քաղաքական համագործակցությունից հետո: Աղվան Վարդանյանը պատասխանեց. «Հիմա ես մի բառ ասացի, ու լրագրողները սկսեցին սևեռվել «վնասվածք» բառի վրա: Այո, վնասվածք ստացել ենք, բայց դա կապ չունի քաղաքական համագործակցության հետ»:

Նա վստահեցրեց, որ համաձայնագիրը, ընդհակառակը, հնարավորություն, դուռ է բացել երկրում արմատական որակական փոփոխությունների համար, որտեղ Դաշնակցության դերակատարությունը բավական մեծ է: