Արծվիկ Մինասյանի խոսքը սխալ է ընկալվել

Այսօր լրագրողների հետ զրույցում էկոնոմիկայի նախարարության ՓՄՁ զարգացման վարչության պետ Արամ Օհանյանը, խոսելով մենաշնորհների մասին, մասնավորապես` էկոնոմիկայի նախարար Արծվիկ Մինասյանի հնչեցրած կարծիքի, թե որոշ դեպքերում պետությունը կարող է օրինականացնել մենաշնորհները՝  պահանջները խստացնելով, ասաց, որ խոսքն ամենևին էլ ինչ-որ մեկին հարկային արտոնություններից ազատելու մասին չի եղել, այլ այդ հայտարարությունն ընդամենը քննարկման առարկա է եղել:

Արամ Օհանյանը օրինակ բերեց «Նաիրիտ» գործարանը` որպես ոլորտում մենաշնորհային դիրք ունեցող գործարան: «Հիմա հարց՝ արդյոք մենք պե՞տք է վերացնենք «Նաիրիտ»-ի նման գործարանը մենաշնորհի դեմ պայքարի ժամանակ, միանշանակ` ոչ, որովհետև հնարավոր չէ` նման հզոր տնտեսավարող այլ սուբյեկտ լինի»,- ասաց նա:

ՓՄՁ համագործակցության ասոցիացիայի նախագահ Հակոբ Ավագյանն էլ կարծիք հայտնեց, որ նման քայլը պարզապես դիսբալանս կարող է առաջացնել, որովհետև օրերից մի օր այդ մենաշնորհի տերը կարող է որոշել չվճարել հարկերը, և դա կարող է ազդել պետական եկամուտների վրա: