ՄԽ համանախագահները հիմա ստանձնելու են շտապ օգնության դեր

Այսօր` լրագրողների հետ հանդիպման ժամանակ, քաղաքագետ Ալեքսանդր Իսկանդարյանն անդրադարձավ հայ-ադրբեջանական շփման գծում լարվածությանը, միջազգային արձագանքին, ԵԱՀԿ Մինսկի խմբի համանախագահների հայտարարությանը:

Նախ պատասխանելով հարցին, թե ի՞նչ կարող էին քննարկել Սերժ Սարգսյանն ու առաջին նախագահ Լևոն Տեր-Պետրոսյանը, քաղաքագետը նշեց, որ, իհարկե, տեղյակ չէ, թե ինչ են քննարկել, ենթադրելի է, որ երկրում բավական սուր իրավիճակ էլ, խնդիրներ կան արտաքին քաղաքականության հետ, մասնավորապես` Ռուսաստանի: Եվ առաջին և երրորդ նախագահների միջև կոնսուլտացիաները բավական նորմալ և դրական երևույթ է:

Ինչ վերաբերում է ԵԱՀԿ ՄԽ համանախագահների արձագանքին և բանակցային գործընթացին, ապա այս իրավիճակում ՄԽ համանախագահների առաքելությունը ոչ թե բանակցային գործընթացն է, այլ շտապ օգնությունը՝ դադարեցնել արյունահեղությունը:

«Ես չեմ հավատում, որ ՄԽ համանախագահների միջնորդությամբ ինչ-որ փաստաթղթեր կստորագրվեն կամ համաձայնության կհասնեն»,- ասաց քաղաքագետը:

Ինչ վերաբերում է Արցախին որպես բանակցային կողմ ներգրավելու անհրաժեշտությանը, ապա, Ալեքսանդր Իսկանդարյանի խոսքով, այս պահին խոսքը գնում է կոնֆլիկտի դադարեցման մասին, և այդ դժվարին վիճակում դժվար թե Արցախին ներգրավեն բանակցային գործընթացում:

Ըստ քաղաքագետի՝ ՄԽ համանախագահները իսկապես չունեն մանդատ` ասելու, թե ով է այս քառօրյա պատերազմում նախահարձակ եղել:

«ՄԽ համանախագահները Մովսեսի առաքյալները չեն, որ այս քառօրյա պատերազմի մեղավորներին ցույց տային: Հիմարներ չկան, բոլորն էլ հասկանում են` ինչ է կատարվել, բայց ՄԽ համանախագահները դիվանագետներ են, նրանք հիմա շտապ օգնության դեր են ստանձնելու»,- ասաց Ալեքսանդր Իսկանդարյանը: