Սփյուռքը Հայրենիքի կողքին է. ՀՀ սփյուռքի նախարարություն

Ապրիլյան այս օրերին Սփյուռքի բոլոր կառույցները, ներկայացուցիչները, բոլոր մեր հայրենակիցները, իրազեկ լինելով Արցախում տեղի ունեցող իրադարձություններին, մեկ բռունցք դարձած՝ իրենց ամբողջական աջակցությունն ու զորակցությունն են հայտնում Լեռնային Ղարաբաղի Պաշտպանության բանակին:

Այսօր Սփյուռքը, հավաքական ուժ դրսևորելով, իր հնարավոր  բոլոր միջոցներն  ի գործ է դնում, փաստելով, որ միշտ եղել է ու կմնա Հայրենիքի կողքին:

Սփյուռքի բոլոր կառույցները, ավանդական կուսակցությունները ամենատարբեր մակարդակներով հրապարակում են  Ադրբեջանի նախահարձակումը դատապարտող հայտարարություններ, տարբեր համայնքներում բողոքի ձայն են բարձրացնում բնակության երկրների իշխանությունների առջև` սանձելու Բաքվի ռազմատենչ նկրտումները:

Զոհվածների հիշատակին հոգեհանգստի և զորակցության պատարագ է մատուցվում Սփյուռքի հայկական եկեղեցիներում:

Մեր հայրենակիցները տարբեր միջոցներով աջակցելու պատրաստակամություն են հայտնում` ընդհուպ մինչև ռազմաճակատ մեկնել:

Այս բոլորը վկայում են հայի միասնական ոգու և Հայրենիքն ամեն ինչից վեր դասելու վճռականության մասին:

ՀՀ Սփյուռքի նախարարություն