Մայրության և մինչև 2 տարեկան երեխայի խնամքի նպաստի կարգում փոփոխությունները հեշտացնում են մայրերի գործը

Այսօր լրագրողների հետ հանդիպման ժամանակ ՀՀ սոցիալական ապահովության պետական ծառայության պետի առաջին տեղակալ Սմբատ Սաիյանը նշեց, որ փոփոխություններ են կատարվել, հատկապես՝ մայրության նպաստի և մինչև 2 տարեկան երեխայի խնամքի համար տրամադրվող նպաստի մասով:

Ըստ նրա` փոփոխություններից մեկն այն է, որ այսուհետ մայրության նպաստի և մինչև 2 տարեկան երեխայի խնամքի համար նախատեսված գումարը ստանալու համար կարող է դիմել ոչ միայն երեխայի ծնողը, այլև նրա կողմից լիազորված երկրորդ կամ երրորդ անձ, ինչը, ըստ Սաիյանի, կհեշտացնի մայրերի գործը:

«Բացի այդ` փոփոխվել է նաև 3–րդ և ավելի երեխայի համար պետության կողմից տրամադրվող ընտանեկան դրամագլխի տնօրինման կարգը: Ըստ նոր կարգի` գումարը կարող են տնօրինել երեխայի ծնունդից մեկ տարի անց միայն` կանխավ ներկայացված բանկային հաշվից: Այս կարգը կգործի միայն մինչ 2016-ի վերջը»,- ասաց Սաիյանը:

Փոփոխություններից հաջորդ այն է, որ մայրության նպաստի և մինչև 2 տարեկան երեխայի խնամքի համար նախատեսված գումարը բացառապես անկանխիկ եղանակով են վճարվում` երկու եղանակով` անձի բանկային հաշվին, իսկ եթե անձը չունի հաշիվ, ապա գումարը ստանալու համար դիմում գրելու ժամանակ անձը տեղում ընտրում է բանկը, և հաշվեհամար են բացում:

Ի դեպ, որպես ընտանեկան դրամագլուխ, երեխայի խնամքի նպաստ ստանալու համար` 2014-ին 6500, իսկ 2015-ին 7800 դիմում է ստացվել:

«Այս փոփոխությունները պայմանավորված են սոցիալ-տնտեսական իրողությունով, քանի որ փոփոխությունների արդյունքում լրացուցիչ հնարավորություն է տրվում ծախսելու այն գումարը, որը տրամադրում է պետությունը: Պետք է ասեմ նաև, որ պահպանվել են երեխայի խնամքի նպաստ ստանալու մյուս ձևերը, և մեր առաջարկածն ուղղակի լրացուցիչ տարբերակ է»,- ասաց Սաիյանը: