«Քաղաքապետ-ավագանի հարաբերություններում հետընթաց կա»

Հանրային մասնակցություն տեղական ինքնակառավարման ծրագրի համակարգող Աբրահամ Արտաշեսյանն այսօր կազմակերպված քննարկման ընթացքում  իր դժգոհությունը հայտնեց Երևանի քաղաքապետ Տարոն Մարգարյանի` ավագանու անդամների հետ համագործակցության մեխանիզմի հետ կապված:

«Մենք ուզում էինք այնպես անել, որ ունենանք ուժեղ քաղաքապետ, բայց չկարողացանք այնպես անել, որ քաղաքապետն իրեն ավագանու անդամ զգա: Հետընթաց կա քաղաքապետ-ավագանի հարաբերություններում: Քաղաքապետն իր մոտ կանչեց և խիստ նկատողություն արեց վարչական շրջանների ղեկավարներին, որ չէին մաքրել Երևանի` ձնով պատված փողոցները: Ես կուզենայի, որ նա գար, ավագանուն հաշվետվություն ներկայացներ: Նա եկել, ասել  է` լավ չեք աշխատում, բայց չի ասել, որ ինքն էլ լավ չի աշխատում: Նա հանրությանը ցույց տվեց, որ անկախ մարմին է, ցույց տվեց, որ իր` ուժեղ կառավարիչ լինելը չի բերում մեր հիմնական նպատակի կատարմանը»,- դժգոհեց Արտաշեսյանը:

Դժգոհությանն արձագանքեց Երևանի քաղաքապետի խորհրդական Գագիկ Բաղդասարյանը և չհամաձայնեց այն տեսակետին, որ քաղաքապետի և ավագանու հարաբերություններում հետընթաց կա: