Ցավոտ-մավոտ չի եղել, խուտուտ են տվել. Շարմազանով

Yerkir.am-ի զրուցակիցն է ԱԺ նախագահի տեղակալ, ՀՀԿ մամուլի խոսնակ Էդուարդ Շարմազանովը:

- Պարո՛ն Շարմազանով, ո՞րը կարող եք համարել 2015-ի ձեռքբերումը:

- Անձնական կյանքում ձեռքբերում կարող եմ համարել այն, որ երեխաներս շարունակում են նորմալ սովորել`  խաղաղ, առօրյա մթնոլորտում: Ձեռքբերում կարող եմ համարել այն, որ  բոլոր հարազատներս առողջ են: Իսկ գործնական կյանքում կարևոր էր  մարտի 24-ին հույների ու ասորիների ցեղասպանության ընդունումը ՀՀ ԱԺ-ի կողմից: Այդ նախագծի  համահեղինակն ու հիմնական զեկուցողը  ես էի: Այդ գործը մենք սկսել ենք հինգ տարի առաջ` երջանկահիշատակ Վահան Հովհաննիսյանի հետ , և ինձ համար շատ կարևոր էր, որ այդ օրինագիծը անցնի ու անցնի միաձայն: Մենք աշխատեցինք  հիմնականում ՀՅԴ  խմբակցության հետ, այդ նախաձեռնության տակ ստորագրեցին բոլոր խմբակցությունները, և այն 115 «կողմ»-ով անցավ: Սա շատ կարևոր էր ինձ համար, ես հպարտ եմ, որ ունեմ հունական արմատներ: Ես 100 տոկոսով հայ եմ և 100 տոկոսով` հույն: Շատ կարևոր է, որ ՀՀ ԱԺ-ն դատապարտեց նաև հույների ու ասորիների ցեղասպանությունը: Նաև կարևոր էր իմ փոքրիկ լուման Ցեղասպանության 100-րդ տարելիցի միջոցառումներում ներգրավված  այն բարեկամական խմբերի մեջ, որոնք  ես էի  ղեկավարում այդ պետություններում մեր գործընկեր պատգամավորների հետ. ցեղասպանության թանգարանների հետ կարողացանք կազմակերպել 100-րդ տարելիցի  ցուցանմուշների ցուցահանդես: Ցեղասպանության դատապարտման բանաձևով հանդես եկան  Չեխիան,  Հունաստանը,  Կիպրոսը,  Լիտվան.  Լատվիան ու Էստոնիան:

-Տարվա կորուստը:

-Սահմանին մեր տղաների ու սահմանամերձ համայնքների մեր բնակիչների շրջանում  ունեցանք զոհեր, դա ամենամեծ կորուստն է, որը կարող է ունենալ յուրաքանչյուր հայ մարդ: Նրանք զոհվեցին Մամիկոնյանների անմահությամբ` հանուն հայրենիքի  նահատակվելով: Այդ կորուստները մեզ ավելի պետք է սթափեցնեն, և պետք է շարունակենք աշխատել` ամենքս մեր տեղում : Իրար պետք է շատ սիրենք ու բարություն շատ քարոզենք:

-Սպասելիքը 2016-ից:

-Առաջին հերթին խաղաղություն, երկրորդը` անվտանգության ամրապնդում. դա շատ կարևոր է, որովհետև մենք ապրում ենք մի տարածաշրջանում, որտեղ անվտանգությունը թիվ մեկ խնդիրն է: Երկրորդը` մենք արդեն անցել ենք սահմանադրական փոփոխությունների հանրաքվեն, և ԱԺ-ն պետք է նոր Ընտրական օրենսգիրք ընդունի, որը պետք է համապատասխանեցնենք  Սահմանադրությանը: Սա շատ կարևոր է , և այստեղ անելիք ունեն ԱԺ բոլոր խմբակցությունները:

-2015-ի Տարվա կինը:

-Տարվա կին են այն կանայք, որոնց տղաներն այսօր սահմանին պաշտպանում են մեզ: Այն մայրը, որը մեզ զինվոր է տալիս, հենց նա է Տարվա կինը: Ես հիշում եմ, երբ հերոս Ազատը մահացավ հակառակորդի դիվերսիայի ժամանակ, նրա մայրը խոստացավ նոր Ազատ  լույս աշխարհ բերել: Եվ նա լույս աշխարհ բերեց նոր Ազատ: Այ,  հենց այդ կերպարն է ինձ համար դառնում Տարվա կին: Ինչպես Նժդեհը կասեր` առյուծածին մայրը, որը նուրբ է ու քնքշանքով լի, բայց, միևնույն ժամանակ, այնպիսի ոգի ունի, որ կարողանում է այդ ոգով դաստիարակել առյուծ որդիներ, որոնց շնորհիվ է, որ Հայաստանը եղել է, կա ու կլինի:

-2015-ի ամենահաջող քաղաքական գործիչը:

-Չեմ կարող իմ կոլեգաների շրջանում առանձնացնել ամենահաջողներին: Ընդհանուր առմամբ, ինձ համար հաջող է այն քաղաքական գործիչը, ով խաղաղություն ու արդարություն է քարոզում: Իսկ նրանք, ովքեր ստորություն են քարոզում, ռմբակոծում են խաղաղ բնակիչներին, օդանավ են խոցում, դրանք ամենաանհաջողներն են: Հաստատ մեր որոշ հարևաններ  հաջող  չեն` ո’չ Թուրքիան, ո’չ էլ Ադրբեջանը:

-2015-ի ամենաանհաջող քաղաքական գործիչը:

-Էրդողանը,  Դավութօղլուն, Ալիևը:Նրանք, ովքեր դարձել են իրենց գաղափարախոսության գերին:

-2015-ի հայաստանյան ամենատպավորիչ իրադարձությունը: 

- Երկու կարևոր իրադարձություն կարող եմ առանձնացնել. մեկը Հայոց ցեղասպանության 100-րդ տարելիցի միջոցառումների անցկացումն էր, որոնք կազմակերպվեցին բարձր մակարդակով: Մենք ապացուցեցինք, որ հայը վերածնվեց, որ հայը ծնկի չի իջել, և 100 տարի անց մենք ապրում ենք, արարում և հզոր ենք, աշխարհը լսում է մեր ձայնը, մենք հիշում ու պահանջում ենք, և որ ամենակարևորն է` կեղծ գալիպոլիները չստացվեցին: Նրանք այնքան էին շփոթվել, որ ուղիղ եթերում Ծիծեռնակաբերդն էին ցուցադրում: Եվ մյուս կարևոր իրադարձությունը` սահմանադրական փոփոխությունների հանրաքվեն էր: Գուցե մենք հիմա տաք ենք ու չենք կարողանում գնահատական տալ դրան,  բայց դա պատմական իրադարձություն է Հայաստանի համար ու շանս` պետության ծառը ուղիղ պահելու համար:

-2015-ին աշխարհում ի՞նչ փոխվեց:

-2015-ին աշխարհը դարձավ սև ու սպիտակ: Գնալով քչանում է մանևրելու տեղը, և դժբախտաբար, աշխարհը գնում է առճակատման: Հուսով եմ, որ առողջ բանականությունը կհաղթի: 2014-ին վտանգները ավելի քիչ էին, քան 2015-ին: 2015-ին վտանգները ավելի տեսանելի են դարձել, և իմ սպասելիքն է, որ 2016-ին առողջ բանականությունը հաղթի, ու  բոլոր խնդիրները լուծվեն բանակցությունների միջոցով: Դրանց մեջ են մտնում թե՛ ԼՂ կարգավորման խնդիրը, թե՛ հայ-թուրքական հարաբերությունները, թե՛ Ուկրաինայի ճգնաժամը:

-Հիմա` մի քիչ հումոր. այծի /2015-ը այծի տարի էր/ ամենացավոտ պոզահարումը` Ձեզ: 

- Տենց ցավոտ -մավոտ չի եղել, խուտուտ են տվել:

-Իսկ երկրի՞ն:

-Կրակոցները և սահմանային լարվածությունը: 

-Ի՞նչ մկկաց այծը Ձեր ականջին հրաժեշտից առաջ:

-Հուշեց, որ ազնիվ աշխատենք, բարի լինենք, հարգենք միմյանց, մեր սխալները տեսնենք:

-Անցնենք կապիկներին` կապիկն ու կապիկությունը տարբե՞ր բաներ են:

-Տարբեր բաներ են, թե` չէ, չգիտեմ, բայց ես հորոսկոպներին չեմ հավատում: Ես գտնում եմ, որ դա նախ մեր ազգայինը չէ, մեր ազգայինը Առաքելական տոնացույցն է: Կապ չունի` ինչի տարի է, կարևորն այն է, որ մենք լինենք հայ քրիստոնյա մարդ:

-Համաձա՞յն եք տեսությանը, որ մարդիկ առաջացել են կապիկներից: 

-Դա տգիտություն է: Մարդիկ առաջացել են մեր Տիրոջից:

-Կապիկություն անելը մարդի՞կ են կապիկներից սովորել, թե՞ կապիկները մարդկանցից:

-Ես մարդկանց մասին շատ ավելի բարձր կարծիք ունեմ: 

-Կապիկի դերն ու նշանակությունը հայ քաղաքականության պատմության մեջ:

-Առհասարակ, չկա:

-Քաղաքականության մեջ կապիկությունը արհե՞ստ է, թե՞ արվեստ:

-Քաղաքականության մեջ կապիկություն չկա: Բոլոր իմ գործընկերներին, որոնք անցնում են կոռեկտության սահմանը, անգամ նրանց կապիկի չեմ նմանեցնում: