Կառավարության այս որոշումը եթե չանվանենք ցավոտ, ապա պետք է անվանենք տապալող. ակցիայի մասնակից

Կառավարության այս որոշումը եթե չանվանենք ցավոտ, ապա պետք է անվանենք տապալող։ Այս մասին ասաց Կառավարության շենքի մոտ ակցիա իրականացնող քաղաքացիներից մեկը։ Նրանք պահանջում են, որ նախ Կառավարությունը վերանայի մաքսազերծման տոկոսները եւ 30 տոկոսից դարձնեն 10 տոկոս, երկրորդ՝ աջ ղեկով մեքենաների մասով զիջումներ անեն, որպեսզի կարողանան այդպես մաքսազերծել, քանի որ կան աջ ղեկով մեքենաներ, որոնց ղեկը չի կարող փոխվել աջից ձախ, երրորդ՝ երկարացնեն ժամանակահատվածը՝ գոնե 6 ամիս ժամկետով։

Ըստ նոր օրենքի, մինչեւ հունվարի 1-ը քաղաքացիները պետք է վրացական համարներով ավտոմեքենաները կա՛մ մաքսազերծեն, կա՛մ Հայաստանից դուրս հանեն։

Նշենք, որ կառավարության նախորդ նիստում որոշում ընդունվեց, որ վրացական համարանիշներով մեքենաները պետք է մաքսազերծվեն եւ դրա համար պետությունը որոշակի չափով սուբսիդավորում է: Մասնավորապես, մինչեւ 5 տարի տարիք ունեցող մեքենաների համար պետությունը սուբսիդավորում է մաքսատուրքի 30 տոկոսը, իսկ 5 տարի եւ ավելի տարիք ունեցող մեքենաների համար՝ 70 տոկոսը: Մեքենաների սեփականատերերը կվճարեն մաքսատուրքի 30 տոկոսը: