Այո, մեր վիճակը ցավոտ է․ ցավոտ երևույթից պետք չէ վախենալ ու խուսափել․ Գնել Սանոսյան

Տարածքային կառավարման և ենթակառուցվածքների նախարար Գնել Սանոսյանը չի հերքում՝ Հայաստանի վիճակը ցավոտ է։ 

«Բայց սա է մեր իրականությունը, մենք հայտնվել ենք այս իրականության մեջ, ու այս իրականության մեջ կարևոր մասնաբաժին ունի խաղաղ ապրելը, ոտքի կանգնելը, տնտեսությունը, բանակը և այլն, ու դրա մեջ կարևոր դերակատարում ունի մեր սահմանների հստակեցումը, որպեսզի անընդհատ մենք սահմանային վեճ չունենանք»,- լրագրողներին ասաց նա։

Նախարարի կարծիքով՝ «ցավոտ» երևույթից պետք չէ վախենալ ու խուսափել։

«Նույնիսկ, եթե մեկ-երկու տեղով էլ կարող է ինչ-որ ցավոտ բան լինել, ավելի լավ է այդ ցավոտ խնդիրը ֆիքսել, նկատի ունենալ, քան անընդհատ ամեն օր ինչ-որ միջադեպեր ունենալ»,- ասաց նա։

Հարցին, թե ի՞նչ քարտեզներով են հստակեցվելու մեր սահմանները, նախարարը պատասխանեց՝ տարբեր քարտեզներ կան, բայց, թե ո՞ր քարտեզները հիմք կընդունվեն, կարևոր է, թե դրանք ինչ իրավաբանական կարգավիճակ ունեն։