Հովիկ Աբրահամյանը գոհ է հանրաքվեի կազմակերպման` իր աշխատանքից

Որոշում է ժողովուրդը, քվեարկության արդյունքները բոլորիս համար ընդունելի են` լավ, թե` վատ. այսօր խորհրդարանում պատասխանելով լրագրողների հարցին, թե գո՞հ է սահմանադրական հանրաքվեի արդյունքներից, քանի որ ընդդիմադիր մի քանի ուժեր հայտարարում են ընտրակեղծիքների մասին, ասաց վարչապետ Հովիկ Աբրահամյանը:

«Հիմա ունենք այն, ինչ որ ունենք: Կան դժգոհություններ, բողոքներ, թող դիմեն պատկան մարմիններին, որ թվերը վերահաշվարկեն, կամ եթե խախտումներ կան, ուսումնասիրեն այդ խախտումները: Որպես շտաբի ղեկավար, մենք կազմակերպել ենք այնպես, որ թափանցիկ անցնեն ընտրությունները, և եթե ընթացքում եղել են խնդիրներ, թող դիմեն պատկան մարմիններին»,- նշեց վարչապետը:

Նրա խոսքով՝ այն արդյունքները, որի մասին հայտարարել է ԿԸՀ-ն, և այն խախտումները, որոնց մասին խոսվել է, չեն կարող էական ազդեցություն ունենալ հանրաքվեի արդյունքների վրա: «Դուք խոսում եք չստուգված փաստերի մասին, երբ դրանք կստուգվեն, ու  այդ խախտումները կհաստատվեն, այդ ժամանակ կպատժվեն բոլոր խախտումներ անողները: Մենք դրա մասին հայտարարել ենք հանրաքվեից առաջ: Ես բազմաթիվ անգամ ասել եմ, որ որևէ մեկը արջի ծառայություն չմատուցի, և եթե մարդիկ ինչ-որ քայլեր են կատարել, ուրեմն պետք է պատասխանատվության ենթարկվեն»,- ասաց Հովիկ Աբրահամյանը:

Նա հավելեց, որ ընտրախախտումների մասին հրապարակումներ տեսել է սոցցանցում, որոնք տարածել են շահագրգիռ մարդիկ, ովքեր ցանկացել են սևացնել ընտրությունների արդյունքները, իսկ դա հիմք չի կարող լինել: «Տեխնիկական հնարքների միջոցով տարբեր նկարներ են ստեղծում ու տարածում համացանցում»,- ասաց Հովիկ Աբրահամյանը:

Հարցին, թե կարծում է, որ այդ բոլոր լուսանկարները և տեսանյութերը մոնտաժի արդյո՞ւնք են, պատասխանեց, որ հենց այդպես էլ կարծում է, իսկ եթե մոնտաժված չեն, ուրեմն այդ մարդիկ պատասխանատվություն պետք է կրեն:

Հարցին, թե ինչո՞վ է պայմանավորված այն շտապողականությունը, որ դեռ վերջնական արդյունքները պաշտոնապես չապահոված, Սերժ Սարգսյանը հայտարարեց, որ անցում է կատարվելու խորհրդարանական կառավարման համակարգին, Հովիկ Աբրահամյանը պատասխանեց, որ համաձայն չէ ձևակերպման հետ, թե դա շտապողական հայտարարություն էր:

Նա չհամաձայնեց նաև լրագրողների այն դիտարկմանը, որ ընտրակաշառք է բաժանվել: Իսկ հարցին, թե արդյո՞ք Հանրապետական կուսակցությունը գոհ է մնացել, որպես շտաբի պետ, իր կատարած աշխատանքից, Հովիկ Աբրահամյանը պատասխանեց. «Կարևորը՝ ես գոհ եմ»: