Հովիկ Աբրահամյանը կմասնակցի սահմանադրական հանրաքվեի նախընտրական շտաբի աշխատանքներին

Այսօր լրագրողների հետ զրույցում ՀՀ վարչապետ Հովիկ Աբրահամյանը հաստատել է, որ մասնակցելու է սահմանադրական հանրաքվեի նախընտրական շտաբի աշխատանքներին` հավաստիացնելով, որ դա չի խանգարի կառավարության գործունեությանը, և որ օրենքի հակասություն էլ չկա: Նա հերքել է սահմանադրական հանրաքվեի նախընտրական շտաբը ղեկավարելու համար վարչապետի պաշտոնից հրաժարական տալու հավանականությունը:

«Մենք առաջիկայում կքննարկենք Հանրապետական կուսակցության ներսում և որոշում կկայացնենք։ Բայց այն, որ աշխատելու ենք, և ես իմ մասնակցությունը ունենալու եմ այդ գործընթացներում, դա քննարկելու հարց չէ»,- ասել է վարչապետը:

Լրագրողները հարցրել են նաև Արա Աբրահամյանի քաղաքական հավակնությունների մասին, ինչին Հովիկ Աբրահամյանը պատասխանել է, որ որևէ անձի կամ քաղաքական գործչի հետ խնդիր չունի, և եթե ժողովուրդն ընտրի, ապա Արա Աբրահամյանը կարող է լինել խորհրդարանում: