Ի՞նչ կապ կա ընդդիմադիր «Նոր Հայաստան» կառույցի և բերման ենթարկված հանցավոր խմբավորման մեջ

Իրենց «Նոր Հայաստան» հանրային փրկության ճակատ հռչակած շտաբի քաղխորհրդի անդամ Անդրիաս Ղուկասյանն այսօր լրագրողների հետ հանդիպման ժամանակ հայտարարեց, որ երեկ Երևանի Նորք-Մարաշ վարչական շրջանում տեղի ունեցած գործողությունները պետք է դիտարկել «համաշխարհային ահաբեկչությունների տիրույթում»:

«Նախ` «Հայոց Վահան» ծառայությունը ես դիտարկել եմ ՀՀ ԱԱԾ-ի կողմից վերահսկվող կառույց: Բանն այն է, որ մեկ տարի է, ինչ այդ շարժումն ունի ֆեյսբուքյան էջ, և նրանց գործունեությունն ազատ է»,- ասաց նա:

Ըստ Ղուկասյանի` երեկվա գործողությունների` «Նոր Հայաստան» շարժման հետ կապ տեսնելը ոմանց շահագրգռվածությունն է: «Անհրաժեշտությունից էին նման բան ասում` մեզ հետ կապված: Մենք կանխատեսում էինք, որ նման բան կմտներ հանրային տիրույթ: Փորձ արվեց մեր հանրությանը իրազեկել, որ կարող են լինել սպառնալիքներ, որոնց մասին մարդիկ չեն մտածել: Փորձ արվեց միջազգային հարթակներում այս ինֆորմացիան տարածել: Չհաջողվեց այս նյութով համաշխարհային դաշտ բերել և ցույց տալ, որ ՀՀ ԱԱԾ-ն լուծեց այս մեծ խնդիրը»,- ասաց նա`հավելելով, որ, միևնույն ժամանակ, անհիմն է համարում այն պնդումը, որ սա իրենց նկատմամբ քաղաքական հետապնդում է:

Ի դեպ, Ղուկասյանն այս ամենը որակեց «շոու»: Նրա կարծիքով` ԱԱԾ-ն նման ձևով չէ, որ պետք է իրականացներ գործողություններ:

Ղուկասյանը տեղեկացրեց նաև, որ իրենց առաջիկա գործողությունների վրա այս մեղադրանքները որևէ կերպ չեն կարող ազդել:

Հիշեցնենք, որ երեկ հանցավոր խմբավորման հայտնաբերումից հետո տեղեկատվություն տարածվեց, որ այն կապ է ունեցել հայաստանյան ընդդիմադիր մի կառույցի հետ: