Ընդդիմադիրները ժողովրդի առաջ պատասխանատվություն կունենան. Հովհաննես Սահակյանը` խորհրդարանական կառավարման մոդելի մասին

ԱԺ պետաիրավական հանձնաժողովի նախագահ, ՀՀԿ-ական Հովհաննես Սահակյանը Yerkir.am-ի հետ զրույցում նշեց, որ խորհրդարանական կառավարման համակարգին անցումն ինքնըստինքյան ենթադրում է ընդդիմադիր գործիչներին լիազորություններ տալու շրջանակ, ինչը, ըստ պատգամավորի, լավագույն առիթն է ընդդիմադիրների համար` իրենց պատասխանատվության շրջանակը գիտակցելու:

«Խորհրդարանական կառավարման ձևն ունի իր յուրահատուկ մոտեցումները, սկզբունքները, կարգավորումները:  Ընդդիմադիրներին լայն լիազորություններ  է տալիս խորհրդարանական կառավարման համակարգը: Եթե այսօրվա 4-5 հոգուց բաղկացած կուսակցությունը հիմա փոքր լիազորություն ունի, խորհրդարանական կառավարման պարագայում կունենա ավելի մեծ լիազորություններ, և ամենակարևորը` խոսելուց, հայտարարություններ անելուց, քննադատելուց բացի, այս դեպքում կունենա նաև որոշակի պատասխանատվություն ու պարտականություն»,- ասաց Սահակյանը` հավելելով, որ ընդդիմադիր գործիչները ժողովրդի առաջ պատասխանատվություն կունենան և, եթե այս կամ այն օրենքին դեմ քվեարկեն, կմեկնաբանեն նաև` ինչն  է պատճառը, որ դեմ են, և եթե նրանց պատճառով չանցնի նախագիծը, ստիպված կլինեն բացատրել`ինչն է խնդիրը:

Անդրադառնալով խորհրդարանական կառավարման մոդելին անցման դեպքում ՀՀԿ-ի` իշխանությունը մասնակիորեն զիջելու հեռանկարին` պատգամավորը հայտարարեց. «Ւշխանությունը զիջելը ժողովրդի կամքն է, եթե ժողովուրդը մեզ ձայն չի տալու, անկախ կառավարաման ձևից` մենք  զիջելու ենք մեկ այլ քաղաքական ուժի, ով ընտրությունների արդյունքում գալու է իշխանության»: