Արգելվել է լուսաբանել թուրք մոդելի կողմից սպանված հայտնի հաղորդավարի մասին լուրերը

Թուրքիայում արգելվել է լուսաբանել օրեր առաջ Ստամբուլի Բեշիքթաշ թաղամասում գտնվող Conrad հյուրանոցում թուրք նախկին մոդել Ֆիլիզ Աքերի կողմից սպանված հաղորդավար Վաթան Շաշմազի մասին լուրերը:

Ըստ Demokrathaber-ի՝ դատախազությունը նման որոշում է կայացրել, քանի որ սպանությունից հետո Շաշմազի և Աքերի լուսանկարներն ու հյուրանոցում արված ոչ պատշաճ տեսանյութերը համացանցում լայն տարածում են գտել:

Հիշեցնենք, որ Շաշմազը սպանվել է նախկին սիրեցյալի՝ 54-ամյա Ֆիլիզ Աքերի կողմից, ով  4 անգամ կրակել է նրա թիկունքին, ապա՝  նույն ատրճանակով ինքնասպան եղել: Որպես սպանության դրդապատճառ` շրջանառվում է այն վարկածը, որ նախկին թոփ մոդել և դերասանուհի Ֆիլիզ Աքերը անպատասխան զգացմունքներ է ունեցել Շաշմազի նկատմամբ: Հայտնի է դարձել, որ Աքերը մի քանի անգամ սպառնացել է սպանել  Շաշմազին, եթե նա չբաժանվի կնոջից ու չամուսնանա իր հետ: Ըստ մի շարք ԶԼՄ-ների՝ Աքերը սպանել է Շաշմազին այն բանից հետո, երբ իմացել է Շաշմազի կնոջ հղիության մասին: Ուշագրավ է նաև այն փաստը, որ նախկին թոփ մոդելի նախկին սիրեկանը նույնպես սպանվել է: